Sermitsiaq nr. 17 2021-mi atuarneqarsinnaavoq Ilinniartitaanermut Kultooreqarnermut Timersorner-mut Ilageeqarnermullu Naalakkersuisortaap anguniagai.
Atuagassiami erserpoq Naalakkersuisortaap aggerfini Aasiaat annertunerpaamik sullinniarlugu aaliangersimasoq, paatsoorneqarsinnaanngitsumimmi tusagassiutinut oqaaseqarpoq ”Aasiaat anginerulersillugulu inerisaaffigissavarput” illoqarfiit allat inerisaaffigineqarnissaannik ataatsimilluunniit oqaaseqanngilaq.
Naalakkersuisortaap oqariartuutigaa, Aasiaat Kultoorikkut illorsuartaassasoq, Nipilersornermik Ilinniarfeqalissasoq aammalu Aasianni GUX inerisaaffigineqassasoq.
Uissuumminarpoq Naalakkersuisoq nuna tamakkerlugu sullissiniartussaagaluartoq aggerfini kisiat aallunniarlugu oqariartuuteqarmat soorlulusooq kommunit akisussaaffiinut susassaqarfiinullu akuliussuunniartoq.
Ukiuni kingullerni politikkikkut siunertaagaluarpoq kommunit tamarmik naligiimmik Kampus-seqalissasut, tassami Kommuni Kujalleq, Kommuneqarfik Sermersooq, Qeqqata Kommunia tamarmik Kampus-eqarput, taamaattoq Qeqertallip Kommunia aammalu Avannaata Kommunia Kampus-eqanngillat. Kampus-illit tassaapput GUX-eqarlutillu Inuussutissarsiutitigut ilinniarfillit. Taamaattumik siunertaanikuugaluarpoq Qeqertallip Kommunia aammalu Avannaata Kommunia kommunit sinnerisulli Kampus-eqalissasut kisianni Naalakkersuisortaap oqariartuutigaa Ilulissani Kampus-imik pilersitsinissaq tapersersorsinnaanagu.
Aasianni ineriartortortitsinissaq tunngaviatigut tapersersornarpoq kisianni kommunit allat pilliutigalugit periuseqarnissaq akuerineqarsinnaanngilaq Naalakkersuisuuneq nuna tamakkerlugu sullissinermik pisussaaffeqarmat! Paaserusunnarpoq Naalakkersuisooqatigiit Inatsisartuutitaasa aamma allat tamanna akuersaarsinnaaneraat?
Doris J. Jensen, Kultoreqarneq ilinniartitaanerlu pillugit oqaaseqartartoq
Siumut