Ullumikkut tusagassiorfitsigut saqqummiunneqarpoq nunatsinni maskinmesterinngorniarsinnaanngortoqartoq. Tamanna Siumumiik assorujussuaq pitsaasutut isumaqarfigaarput, taamaasironikkummi nunatsinni maskinmesterinngorniarsinnaanerup ingerlanneqarsinnaanissaa anguniarlugu siuttuusimanitsinni anguniagarisimasatta piviusunngorneratut oqaatigineqarsinnaammat.
Siumup siulittaasut Erik Jensen maskinmesterinngorniarsinnaaneq periarfissaalersoq pillugu nuannaarpasilluni ima oqarpoq:
”Ullumi nutaarsiassaq nuannerluinnartoq saqqummiunneqarpoq. Tassa nunatsinni maskinmesterinngorniarsinnaaneq periarfissaalilerpoq. Taamaasilluta soorlu kilisaatini aqumiut maskinmesterit amigaatigeqisagut nunatsinni ilinniarsinnaalerput, tamatumallu kingunerisaanik inuttat tamakkiisumik 100%-imik nunaqavissuunissaannik piviusunngortitsinissamut alloriarnerulluni.”
 Siumup Siulittaasua Erik Jensen oqarpoq.
Suleriaqqinnissami KTI-p sumiiffimmi ataatsimi teknikkikkut assassornikkullu ilinniartitaanerit ataatsimoornissaat Siumup anguniagaraa, ilaatigullu maskinmesterinngorniarsinnaanerup pilersinneratigut aamma ilinniakkat allat aallartinneqarsinnaanerat periarfissanngorsinnaanngussasoq Siumut isumaqarpoq. Tamanna pillugu Siumup siulittaasua Erik Jensen ima nangilluni oqarpoq:
”Massakkut periarfissaq pitsaasoq pilersinneqarpoq. Teknikkikkut ilinniartitaanerit nunatsinni pisariaqartitagut assigiinngittut ilinniarfimmi ataatsimi pileriortortariaqarpagut. Assersuutigalugu fiskeriteknologi assigisaallu. Taamaattumik siunissaq qaamasumik ingerlavoq, neriuutigaarpullu naalakkersuisunngortut aamma suliaq ingerlassimasagut nangillugit ingerlateqqissagaat.”
Erik Jensen, Siumumi Siulittaasoq