Tunumi nannuttassat amerlineqarnissaat Siumup kaammattuutigaa – ilisimatusarneq tunngavigalugu
Siumup Naalakkersuisut kaammattorpai, Tunumi nannuttassat amerlineqassasut, tamannalu Pinngortitaleriffiup ilisimatusarnerminut tunngatillugu nutaamik saqqummiussinerata kingunerisaanik pissasoq. Nalunaarusiap takutippaa Tunumi nannut siornatigut naatsorsuutigineqartunit amerlanerusut aamma piujuartitsisumik inissisimalersimasut. Siumup erseqqissarpaa pisassiissutit qaffanneqarnissaat akisussaassuseqartumik ingerlanneqassasoq, aamma Tasiilami Ittoqqortoormiinilu piniartut suleqatigalugit nakkutilliineq ilutigisaanik annertusarneqassasoq, soorlu nalunaarusiami allanneqarsimasutut.
Pinngortitaleriffik 2023-mi aamma 2024-mi Tunumi nanoqassutsi pillugu misissuivoq.
Pinngortitaleriffiup nalunaarusiaa nutaaq tunngavigalugu erserpoq, Tunumi nannut amerlassusaat siornatigut naatsorsuutigineqartunit amerlanerusut aamma allanngorannginnerusut. Ilisimatusartut naapertorlugit tamanna tunngavigalugu piujuartitsisumik pisassiissutit qaffanneqarsinnaapput, nakkutilliineq akisussaassusilimmik ingerlanneqarpat aamma alaatsinaalluni misissuisoqartarnissaa annertunerulersillugu ataavartumik ingerlanneqartarpat.
– Pingaarpoq nungusaataanngitsumik piniarnerput ingerlanneqassasoq aamma pisassiissutit ilisimatusarnermik piniartullu ilisimasaanik tunngavilerneqarsimasassasut. Maanna ilisimatusarnermi takutinneqarpoq Tunumi nannut amerlasuut assigiinngiiaarlutillu piujuartitsisumik ineriartortut, taamaattumik Naalakkersuisut ilisimalikkanut qisuariaateqarnissaat pisariaqarluinnarpoq. Avatangiisinik mianerinninneq aammalu piniartut pisuussutinik atorluaanissamik pisinnaatitaaffiat pillugit, Siumut sinnerlugu Inatsisartunut ilaasortaq, Lars Poulsen oqarpoq.
Siumup naqissuserumavaa, pisassiineruneq sumiiffimmi aamma ilisimatuussutsikkut ilisimasat tunngavigalugit pissasoq pisariaqarmat, malitsigisaanillu alaatsinaalluni misissuisoqartarnissaa annertusarneqartariaqassammat.
Ilisimalikkat kingulliit tunngavigalugit Siumup Naalakkersuisut kaammattorpai, Pinngortitaleriffik aammalu piniartut peqatigiiffii Tasiilami Ittoqqortoormiinilu suleqatigalugit nannuttassat pillugit nutaamik aalajangersaasoqassasoq aamma nakkutilliinermut nalunaarusiornermullu suleqatigiinnissaat qulakkeerneqassasut.
– Piujuartitsisumik atorluaaneq inuiaqatigiinnut iluaqutaassaaq. Takorloorpara Tunumi nannuttassat katillugit 80-inut qaffanneqarsinnaasut, taakkulu Tasiilamut aamma Ittoqqortoormiinut naligiimmik agguaanneqarsinnaasut. Ilisimalikkavut nutaanerpaat tunngavigalugit periarfissaqarpugut pinngortitaq illersorlugu eriagalugulu piniartut inuutissarsiutaannik ataqqinnissalluta, Lars Poulsen naggasiivoq.