Tunngaviusumik Inatsisissap inuiaqatigiinni oqaloqatigiissutigineqarnissaa siunertaralugu Inatsisartut immikkut ittumik aningaasaliissuteqarnissaanik Siumup Inatsisartuni gruppia siunnersuuteqarpoq.
All.: Doris J. Jensen, politikikkut oqaaseqartartoq, Siumut
Inatsisartut suliakkiissuteqarnerisigut Inatsit Tunngaviusussaq pillugu Isumalioqatigiissitat 2017-mi pilersinneqarput, isumalioqatigiissitallu isumaliutissiissutaat 29. april 2023 Naalakkersuisunut Inatsisartunullu tunniunneqarpoq.
Tunngaviusumik inatsiseqarneq nunanut uatsinnut sanilliuttakkatsinnut pingaaruteqarluni inissisimasarpoq, tunngaviusumik pineqartarmat, inatsisit inuiaqatigiinni qaqugukkulluunniit suliarineqartartussat qanoq tunngavissinneqarsimanissaanik erseqqissunik allassimasuuteqarnissaq toqqissisimanarnerpaajusarmat .
Taamaattumik Siumut isumaqarpoq, qinikkatut pisussaaffigigipput suliarujussuaq uatsinnut tunniunneqartoq inuiaqatigiinnut ingerlateqqissallugu naggataatigullu inuiaqatigiinnit taasissutigineqarnissaa naammassissallugu.
Suliassarlu tullinnguuttoq unaavoq, tunngaviusumik inatsisissatut suliaq inuiaqatigiinni oqaloqatigiissutigalugu aallartissasoq. Tamanna pisariaqartutut Siumumi isigaarput, pingaartumik Isumalioqatigiissitat ukiuni tallimani sulinerminni naammattumik innuttaasunik peqataatitsisimanngimmata, ilaatigut Coronap atugaanerata nalaanni uninngatitsisariaqalersimaneq pissutigalugu.
Suliassanuttaaq ilaapput Inatsit Tunngaviusussaq pillugu Isumalioqatigiissitat isumaliutissiissutaat naqitanngorlugu inoqutigiinnut tamanut siammarterneqarnissaata naammassinissaa inuiaqatigiinnilu oqaloqatigiissutigereerutsigu aamma innuttaasut tamatta apeqqummut taasitinneqarnissarput tikinneqartussaassammat.
Taamaattumik Siumup Inatsisartuutitai ataatsimoortut siunnersuuteqarput, tunngaviusumik inatsisissap inuiaqatigiinni oqaloqatigiissutigineqarnissaa siunertaralugu Inatsisartut immikkut ittumik aningaasaliissuteqassasut. Taamaaliornitsigut innuttaasut Isumaliutissiissut pillugu oqaloqatigiinnermikkut qanoq isummernerat qularnaatsumik ilisimalissagatsigu.
Siumumi isumaqarpugut, tunngaviusumik inatsisissaq isumalioqatigiissitanit suliarineqarsimasoq innuttaasunit isummersorfigineqareerpat taasisitsinissaq tullinnguutissasoq. Suliaq tunngaveqarluartumik peqataatitsilluarnikkullu ingerlanneqarpat, Siumumi qularutiginngilarput innuttaasut amerlanerussuteqarluartut Tunngaviusumik Inatsimmut tunuliaqutsiiumaartut.