Timersuutit inuiaqatigiittut nunarsuarmioqatitsinnullu malunnaatigilluarnerusinnaassavut ukkatarinerullugit suliniuteqarnerulertariaqarpugut. Kalaallit Nunaat nunatut namminersorumasutut timersornermik pingaartitsinerulluni ingerlatsilertariaqarpoq, pingaartumik meerartavut inuusuttortavullu pillugit. Taamaattumik Siumut ukiuni aggersuni timersorneq aningaasanut inatsisini salliutinneralugu ingerlajumavoq, inassutigalugulu ukiuni aggersuni timersuutit aalajangersimasut ilanngullugit immikkut iliuuseqarfigineqassasut. Nuannaartorisaqarneq inuusuttunut inuiaqatigiinnullu pisariaqarpoq, suliniullu pinaveersaartitsinermut annertuumik sunniuteqassasoq qularnanngilaq, inuusuttullu timersornikkut peqqinnartumik pitsaasumillu toqqaassallutik periarfissaqarnerulernissaat aqqutissiuunneqassaaq.
All.: Siumup Inatsisartuni gruppia
Suut tamaasa suliaqarfigissallugit akissaqanngilagut. Kisianni isumaginngitsoornissaanut aamma akissaqanngilagut. Taamaattumik tamatsinnut isumassarsiatsialaassaaq timersuutit immikkut ukkatarisinnaasagut toqqarsinnaagutsigit, nunarsuarmioqatitsinnut unammisarnissatsinnut aqqutissiuussisinnaasut aamma uagut kulturikkut kinaassuseqarnitsinnut pingaaruteqartut.
Timersuutit tapersersorneqarluartut nunanilu tamalaani anguneqarsinnaasut assersuutigalugu tassaapput assammik arsarneq, arsarneq/futsali, taekwondo aamma sisorarneq. Aammattaaq timersuutit marluk kulturitsinnut kinaassutsitsinnullu immikkut ittumik pingaaruteqartut tassaapput, qajartorneq qimussernerlu.
Timersorneq aqqutigalugu ataatsimut nuna tamakkerlugu meeqqanut inuusuttunullu periarfissanik tunisissaagut, inuttut timersortartutullu ineriartornissamut, taamalu aamma assersuutaalluarnissamut. Inuusuttunut pingaaruteqarpoq peqqinnartumik sunngiffimmi sammisassaqarnissaq, ilisimallugu inuiaqatigiinni sammisat maluginiarneqartut. Inuusuttut aamma inuiaqatigiit ataatsimut nuannaartorisaqarnissamik pisariaqartitsipput, suliniullu qularnanngitsumik pinaveersaartitsinermut sunniuteqartorujussuussaaq, inuusuttullu amerlanerusut timersornikkut peqqinnartumik pitsaasumillu toqqaassaqarnissaanut periarfissaqarnerulersitsissaaq.
Timersuutit soorlu assammik arsarneq, arsarneq/futsali, taekwondo aamma sisorarneq, tassaapput timersuutit, Kalaallit Nunaata nunarsuarmiut akornanni nittarsaalluni periarfissaqarfigilluarnerpaassai. Assammik arsarneq, arsarneq /futsali aamma taekwondo ukioq kaajallallugu illup iluani ingerlanneqarsinnaapput, sisorarnerlu ukioq kaajallallugu silami ingerlanneqarsinnaavoq. Assammik arsaannermi nunanut tamalaanut unammisartoqatigiit aamma U18, arnat angutillu tamarmik, pillugit ingerlaavartumik aningaasaliisoqartariaqarpoq. Sisorarneq pillugu sangusaarneq, ujakkaarneq, snowboard aamma freestyle immikkut aallunneqartariaqarput.
Timersuutit allat tamarmik, ullumikkut aningaasaliiffigineqartartut, ingerlaavartumik ilanngullugit aningaasaliiffigineqartuaannassapput.
– Timersorneq inuiaqatigiinnut pingaarutilimmik annertuumillu sunniuteqartuuvoq. Inuit katersortarpai, inuiaqatigiinnut peqataatitsilluni, kultureqarnermut naleqartitatsinnullu takutitsilluni nukittorsaaqataasinnaavoq aamma inuup namminerisamik ingerlatsinissaanut inuussutissarsiornissaanullu siuarsaaqataasarpoq. Ilanngullugu timikkut tarnikkullu peqqilluni inuuneqarnissamut pitsaanerulersitsisarpoq, inuunermi naleqartitanut, suleqateqarsinnaanermut attassisinnaassuseqarnermullu iluaqutaasarpoq minnerunngitsumillu inuit akornanni attaveqaqatigiinnermut tatigeqatigiinnermullu annertusaasarpoq aamma aningaasarsiornermut takornariaqarnermullu sunniuteqartarpoq soorluttaaq inuiaqatigiinni ajornartorsiutit aaqqiivigineqarsinnaaneranut qaninnerulersitsisartoq. Katillugu timersorneq inuiaqatigiinni pingaarutilimmik inissisimavoq, Karl Tobiassen Siumup gruppia sinnerlugu oqarpoq.
– Taamaattumik Siumut isumaqarpoq, timersorneq aningaasaliiffigineruneqartariaqartoq, tamanna aqqutigalugu timersuutit ingerlanneqartut aalajaatsumik siammasissumillu ingerlanneqaqqullugit. Tamanna inuusuttorpassuarnut peqatigiinnerunissamullu aqqutissiueqataassaaq, Karl Tobiassen naggasiivoq.