Tasiilami nunaqarfinnilu tikeraareerlunga oqariartuut ataaseq ersarippoq: Tunngaviusumik ajornartorsiutit aaqqinngikkutsigit, piviusumik ineriartortitsisoqarsinnaanngilaq.
Kalaallit Nunaata Kangia periarfissaqarluarpoq, attaveqaasersuutilli naammaginannginnerat ineriartornermut killiliivoq. Nukissamik pilersuinerup killeqarnera anginerusunik sanaartornissamut akorngusiivoq. Timmisartunik umiarsuarnillu angallannermi patajaatsuunngitsumik ingerlatsineq innuttaasut inuussutissarsiortullu periarfissaannik aporfilersuivoq, telekkullu attaveqarnerup arriinnera avinngarusimanermik misigissuseq annertusitippaa. Taamaattumik ullumikkumut tulluussakkanik aaqqiissutissanik pisariaqartitsisoqarpoq – ilaatigut nukissamik pilersuinerup pitsaanerulersinneqarnissaa, ukioq kaajallallugu angallannikkut patajaatsumik ingerlatsinissaq kiisalu immap naqqatigut fiberkabelimik pilersitsinissaq.
Sermiligaami najukkami innuttaasut inuussutissarsiutinik pilersitsiniarlutik aalisakkanik tunisinikkut tunisassiornikkullu suliffissanik pilersitserusupput, imeqarniarnikkulli naammattumik periarfissaqannginneq akornutaavoq. Imermik pisariaqartinneqartumik pilersuinikkut, assersuutigalugu immap ernganik tarajuiaanikkut, najukkami aallarnisaasut namminneq ineriartortitsinissamut suliffissanillu pilersitsinissamut periarfissinneqarsinnaapput.
Peqatigisaanik meeqqat inuusuttullu annertunerujussuarmik aningaasaliiffigisariaqarpavut. Najukkami ilinniarnissamut periarfissat, pinaveersaartitsineq, timersorneq sammisassaqartitsinerlu nukittorsarneqartariaqarput. Ullumikkut inuusuttut amerlavallaat ilinniagaqassagunik angerlarsimaffitsik qimattariaqarnerat pissutigalugu aporfissarpassuarnik naapitaqartarput.
Tunngaviatigut politikkikkut pingaarnersiuinissaq pineqarpoq. Kalaallit Nunaata Kangia aaqqiissutaagallartunik naammaginnittariaqanngilaq. Aningaasaqarnikkut siuariartorneq, suliffissat inuunermilu atugassarititaasut pitsaanerusut pilersissagutsigit, tunngaviusut aningaasaliiffigisariaqarpavut: nukissamik pilersuineq, angallanneq, telekkut attaveqarneq, ilinniartitaaneq kiisalu najukkami inuussutissarsiornissamut periarfissat.
Tasiilami nunaqarfinnilu inuit nukittuut, suliniuteqarsinnaassuseq ineriartortitsinissamullu piumassuseq pigereerpaat. Uagut suliassaraarput taakku ineriartortitsinissamut periarfissaqalersillugit sinaakkutinik pilersitsinissaq.