Nunatsinni meeqqat inuusuttullu naqinnernik ilisarinnissinnaanngitsut aamma allanniarnermikkut atuarniarnermikkullu ajornartorsiuteqartut, kisimiittutut misigisarnerat, siusinaartumillu ikiorserneqartannginnerat allanngortariaqarpoq. Aqqutissiuunneqartariaqarput inuiaqatigiinni suleqataalernissaminnut ilinniagaqalersinnaanissaminnullu
All.: Paarnannguaq Mathiassen, Ilulissat
Isumaqarpunga innuttaasut naqinnernik ilisarinnissinnaanngitsut siusinaartumik iliuuseqarfigineqarsinnaasariaqartut, ilinniaqqinnissamullu ikiorserneqartarnerannut tunngasut tigussaanerusariaqartut.
Pingaartippara kikkulluunniit maani nunami atorfissaqartinneqarnerat oqaasiinnaanani timitalerneqassasoq: akuutitsinikkut aqqutissiuussinikkullu.
Siullermik aperisariaqarpunga ullumikkut nuna tamakkerlugu meeqqat atuarfiini, meeqqat inuusuttullu, naqinnernik ilisarinnissinnaanngitsut, atuarniarnermikkut allanniarnermikkullu, ajornartorsiuteqartut ikiorserniarlugit qanoq suliniuteqartoqarnersoq?
Ingerlariaqqittariaqarpugut, naqinnernik ilisarinnissinnanngitsunut nammineq oqaatsivut atorlugit misiliuteqalernissarput piviusunngortariaqarpoq.
Maani nunami ilisimasagut piginnaasallu atorlugit ataatsimoorluta ineriartortitsisa, peqataatitsisa, periarfissarsiuussillutalu.
Nunatsinni meeqqat inuusuttullu naqinnernik ilisarinnissinnaanngitsut aammalu allanniarnermikkut atuarniarnermikkullu ajornartorsiuteqartut, kisimiittutut misigisarnerat, siusinaartumillu ikiorserneqartannginnerat allanngortariaqarput.
Taasuma saniatigut inunnik sullissinermi aqqutissat eqaannerullutillu ersarinnerusinnaanerat nukittorsarneqartariaqarpoq. Meeqqat atuarfiat, MISI, majoriaq, inunnik isumaginnittoqarfik, peqqinnissaqarfillu pitsaanerusumik naleqarluartumillu suleqatigiissinnaanerat eqqarsaatigalugu. Piginnaasat, suliffiillu pioreersut atorluarnerisigut, periarfissat ersarissarneqartariaqarmata pitsaasumik meeqqanut inuusuttunullu aqqutissiuussisarnissaq qulakkeerumallugu.
Oqariartuutigerusuppara inuusuttut allanniarnermikkut atuarniarnermikkullu ajornartorsiuteqartut aamma naqinnernik ilisarinnissinnaanngitsunut atugassarititaasut ilinniartitaanerup tungaatigut immikkoortinneqassanngitsut. Aqqutissiuunneqartariaqartullu inuiaqatigiinni suleqataalernissaminnut ilinniagaqalersinnaanissaminnullu.
Saperata allannguisinnaavugut, aaqqiissutissat takusinnaallugit nipangersimaannartanngikkutta. Assigiinngissuseq nukittoqqutissaraarput.