Kommuneqarfik Sermersuumi borgmesteriusimasut marluk inatsisaatsuliorluni inissianik attartortarsimaneq pillugu, inatsisinik tunngaveqartumik allaffissornikkut ingerlatsisussaaneq akisussaaffigisartik, annertuumik sumiginnarsimavaat. Siumumit sivisuumik qinigaaffiit siuliinili uparuartareersimavarput aamma qinigaaffik una aallartimmalli annertuumik akerleralugu oqaatigiuarparput. Pisariaqartitsinerusunik pingaartitsinerunatik pisoorsuarnut aningaasaatilinnullu tapiissutit atorlugit aningaasarsiorfissaqartitsilluarput, illit uangalu nammaligassatsinnik.
All.: Dorthe-Marie Mogensen-Fontain aamma Peter Davidsen, Sermersuummi kommunalbestyrelsimut ilaasortat, Siumut.
Kommunini qinikkat amerlanerussutertik neqitaralugu inatsisaatsuliornermik ingerlatsinerat Siumumit isiginngitsuusaarneqarsinnaanngitsutut qisuariarfigisariaqartutullu naqissuserusupparput. Tamannalu aaqqinneqartariaqarpoq, nunami inatsisinik avaqqutsilluni ingerlatsineq maannamut ingerlasoq Siumumit akerlerilluinnaratsigu. Naatsumik oqaatigalugu, inatsisaatsuliortut ingerlatsisinnaanngillat, tassami pillarneqartaraluarput.
Kommuneqarfik sermersuumi qaammatini kingullerni inissiaqarnermik aaqqissuussisimaneq inatsisaatsuliornikkut ingerlanneqarsimanera naqissuserneqarpoq, tassa sanaartortussat aningaasatigut atukkerneqarsimapput kommunimiit aammalu kommunip saniatigut sanaartugaat attartorlugit; attartuinerup akigititarisaaniit akit qaffasinnerujussuarnik akiliisarlutik. Iluanaartorlu ataasiinnaavoq tassa sanaartortut attartortitsisut.
Naluneqanngitsutut uani qinigaaffimmi piffissaq annertooq ”iluarsaassinermut” atorneqarpoq, tamannalu aamma amerlanerussuteqartuniit oqaatigineqartuarpoq iliuuseqarfigineqarniarlunilu. Tamatuma takutippaa borgmesteriusimasut kommunalbestyrelsi sinnerlugu allaffissornikkut qullersaasut akisussaasullu inatsisit malinnagit sulisimammata, ”iluarsaassineq” inatsit malillugit ingerlanniarneqarlersoq – naak politikikkut kinguneqartitsineq?
Soorunami ”iluarsaassinermi” inatsisit malillugit aaqqiissuteqarniarnerit Siumumit kissaatigiuarparput aaqqiinissamullu peqataassaagut.
Innuttaasut kommunini najugaqartut akileraarutaat akisussaassuseqanngitsumik pinnguaralugit ingerlatsineq Siumumit sakkortuumik uparuartuarsimavarput, aamma taamak ingerlatsisimaneq nunamut tamarmut sunniuteqarpoq, tassami 1,3 milliardit missaat tamatta nammatassaraavut.
Politikertik qimassimagaat tamatta takusinnaavarput. Pisariaqartitsinerusunik pingaartitsinerunatik pisoorsuarnut aningaasaatilinnullu tapiissutit atorlugit aningaasarsiorfissaqartitsilluarput. Socialistiunerminnik kanngusuuteqannguaratik oqariartuuteqariarlutik, ulluinnarni killormorluinnaq ingerlatsipput, silarsuaq mumillugu socialisme pisoorsuarnut iluaqutissanngortillugu, aamma akileraartartunut tamatsinnut aningaasalersugassanngortillugu.
Qinigaaffillu naajartulersoq takuneqarsinnaavoq kommunini kikkut aqutsinermik ingerlatsisinnaannginnersut. Tamannalu aaqqiivigineqarnissaanik aamma politikikkut kinguneqartitsisoqarfiunissaanik suli ujartuiffigaarput, qanorluunniimmi tamanna allaqqunneqarsinnaanngilaq.