Siumut Kalaallit Nunaanni peqqissutsimik nukittorsaaniarpoq siusissukkut nappaatinik paasisaqarnikkut pitsaanerusunillu katsorsaanissamut periarfissiinikkut
All.: Ane Lone Bagger, Siumut tunuliaqutaralugu folketingimut qinigassanngortittoq
Peqqissuseq nunami sumi najugaqarnerup aalajangissanngilaa. Kalaallit Nunaanni innuttaasut siammarsimallutik najugaqarput, tamannalu peqqinnissaqarfimmut atortulersorluakkamut immikkut ilisimasalinnillu sullissiffiusumut periarfissaqarnermut immikkut unammillernartorsiortitsivoq. Taamaattumik Siumut suliniutini nukittorsarniarpai, innuttaasut kunngeqarfiup iluani tamarmik pitsaanerusunik naligiinnerusunilu peqqissutsikkut sullissivigineqarnissaat qulakkeerniarlugu.
Siumut Folketingimi sulissutiginiarpaa nunani innuttaqassusaat ikitsuni aammalu siammarsimasuni inoqarfiusuni nunanit tamalaanit periutsit misissuiffigineqarnissaat, taakkulu Kalaallit Nunaanni peqqissutsimik misissuisarnernik katsorsaanermillu periarfissanik pitsaanerulersitsisinnaanersut. Anguniarneqarpoq nappaatit siusissukkut paasineqarnissaat – pingaartumik inuunerlunnermit patsiseqartartut aammalu kræfti – innuttaasut ukiuinut immikkoortiterlugit peqqissutsimik misissuisarnerit atuutilersinnerisigut.
Partiip nuannaarutigaa danskit naalakkersuisuisa Danmarkimi katsorsarneqarnermut aningaasartuutit akilertalermatigik, aammalu Naalakkersuisut danskillu naalakkersuisuisa akornanni suleqatigiinneq ineriartortinneqassasoq kissaatigalugu, Kalaallit Nunaanni peqqinnissaqarfik nukittorsarniarlugu.
Siumut aammattaaq napparsimasunut annertuumik nappaatilinnut pitsaanerusumik tapersersuinissaq sulissutiginiarpaa. Tamanna ilaatigut Københavnimi Kalaallit Napparsimasut Illuanni ininik amerlanerusunik pilersitsinikkut kiisalu nerisassanik kalaallinik amerlanerusunik sassaalliuteqartarnikkut pisinnaavoq, taamaalillutik napparsimasut ilaqutaasalu najugaqarnerisa nalaani toqqissisimanerusumik misigisaqarsinnaaqqullugit.
Taassuma saniatigut Siumut immikkut ilisimasalinnut sukkasuumik innersuunneqarsinnaanissaq sulissutigissavaa aammalu Danmarkimi assinganik katsorsarneqarnissamut qulakkeerinninneq Kalaallit Nunaanni atuutilersinneqarnissaa anguniarlugu.
Peqqissuseq inuiaqatigiinnik nukittuunik pilersitsinissamut tunngaviuvoq. Pinaveersaartitsineq, siusissukkut nappaatinik paasisaqarsinnaaneq aammalu sukkasuumik katsorsaaneq nukittorsarlugit Siumut Kalaallit Nunaanni innuttaasut tamarmik pitsaanerusumik inuunerissaarnerunissamillu toqqissisimaffeqarnissaannik qulakkeerinnikkusuppoq.