Kalaallit Nunaat pillugu ataatsimiititaliami qinigaaffimmi ukiuni marlunni siullerni Aki-Matilda Høegh-Dam siulittaasuusussanngorpoq, Issittoq pillugu ataatsimiititaliami qinigaaffiup ingerlanerani ukiuni marlunni aamma siulittaasuusussanngorluni
Issittoq pillugu ataatsimiititaliami Savalimmiunit Sjúrður Skaale, Javnaðarflokkurin, qinigaaffimmi ukiuni marlunni siullerni siulittaasooqqaassaaq. Kalaallit Nunaat pillugu ataatsimiititaliami Aki-Matilda Høegh-Dam qinigaaffiup ingerlanerani siulittaasooreeruni ataatsimiititaliami siulittaasup tulliatut inissisimalissaaq.
Nunanut allanut ataatsimiititaliami inissitsiterisoqaqqippat Aki-Matilda Høegh-Dam ataatsimiititaliami ilaasortaalissaaq, kiisalu NATO-p Inatsisartuini, inatsisinik atuutsitsinermut ataatsimiititaliami kiisalu nunasinermut allamioqarnermullu ataatsimiititaliami ilaasortaassalluni.
– Isumaqatiginninniarnerit angusaqarfiulluarput. Nunarput sinnerlugu ataatsimiitsitaliani pingaaruteqarnerpaat ilaanni ilaasortaaffeqalerpugut soorluttaaq ilaatigut siulittaasuuffeqalerluta. Kalaallit Nunaat pillugu ataatsimiititaliami siulittaasuuffik Nunatsinnit Folketingimi siulittaasuuffiup avinneqarnissaanik neriorsuut aamma attanneqarpoq, Aki-Matilda Høegh-Dam oqarpoq.
Nunanut allanut tunngatillugu ataatsimiititaliami 2023-mi aasakkut sulinngiffeqareernermi inissitsisoqarpat ilaasortanngornissani qilanaaraa.
– Kalaallit Nunaat ukiuni kingullerni eqqumaffigineqarnerujartuinnavippoq. Taamaattumik Kalaallit Nunaat pillugu aalajangiinernut peqataatinneqartariaqarpugut. Tamanna inisseriarmat maanna pingaartillugu sulissutigissavara nunatta Inatsisartui suleqatigialugit paasissutissanik eqqortunik isertuuffigineqannginnissaat, Aki-Matilda Høegh-Dam oqarpoq.
Aki-Matilda Høegh-Damip ilaasortaaffigisassai:
– Kalaallit Nunaat pillugu ataatsimiititaliami ukiuni marlunni siullerni siulittaasuussaaq. Ukiuni marlunni tulliuttuni siulittaasup tulliatut inissisimassaaq.
– Issittoq pillugu ataatsimiititaliami ukiuni marlunni siullerni ilaasortaaqqaassaaq, ukiuni marlunni tulliuttuni siulittaasuussalluni.
– Inatsisinik atuutitsinermut ataatsimiititaliaq.
– Nunanut allanut tunngatillugu ataatsimiititaliami ilaasortat inissinneqaqqippata ilaasortanngussaaq.
– Nunasinermut allamioqarnermullu ataatsimiititaliaq.
– NATO-p Inatsisartuini ilaasortaq