Siumup kalaallit Danmarkimi ilinniagaqartut periarfissaat annertusarusuppaa

All: Ane Lone Bagger, Siumut tunuliaqutaralugut folketingimut qinigassanngortittoq

Siumut Folketingimi kalaallit ilinniartut atugaasa – ilinnialinnginneminni, ilinniarnerup nalaani ilinniakkamillu naammassisimareernerisa kingorna pitsaanerulersinniarlugit sukataarluni sulissuteqassooq.

Siumut folketingimi bachelorinngorniarluni Danmarkimi pisortanit akilerneqarluni kalaallinut ilinnialerusuttunut 6.0 qaangerlugu karakterilinnut aaqqissuussineq attatiinnarneqassasoq sulissutigigissavaa. Ilutigitillugulu Siumup sulissutigissavaa Ilisimatusarfiup danskit universitetiisulli tamakkiisumik akuerineqassasoq, bachelorimik naammassinnissimasut kanditatitullu ingerlaqqikkusuttut ajornaquteqanngitsumik isersinnaatinneqassammata.

Ilinniartunut ineqarniarneq ilinniarfinni illoqarfinni anginerusuni ataavartumik unammillernartuuvoq. Taamaammat Siumut Folketingimi ilinniartunut inissanik akilersinnaasanik pilersitsiniarluni sukataaruteqassaaq – taakkununnga ilaatillugit ilaqutariinnut ilinniartut inaat. Naalakkersuisut aamma danskit naalakkersuisui peqatigalugit Siumut immikkut ittumik ineqarnermut ilinniarnerup aallartinnerani akiliummut tapiiffigineqartarnissamik pilersitsinissamik kissaateqarpoq.

Siumumiit aamma ilinniarnermusiat angissusaat inuuniarnermut naapertuunnersut misissorneqassaaq, qaavatillugu sulissutigissavarput ilinniartoq Kalaallit Nunaannut  ilinniarnerminut atatillugu suliartorsinnaassasoq, inigisani annaanngikkaluarlugu.

Taakkua qaavatigut Siumup kalaallit ilinniartut inuussutissarsiortullu akornanni suleqatigiinnerup nukittorsarneqarnissaanik suliniuteqassaaq, amerlarnerit ilinniarnerminnut atatillugu sulisinnaanissaat aqqutissiuukkumallugu. Ilutigitillugulu kalaallisut tunuliaqutaqarnerup immikkut piginnaasatut nukittoqutitullu akuerineqarnissaa.

Ilinniarsimasummi tamarluinnarmik nunatsinni pisariaqartinneqarput!