Ataatsimeeqatigiit Islandimi aamma Nunatsinni ineriartorneq pillugu ilisimateqatigiipput, isumaqatigiissutigaallu nunatut sanileriittut suleqatigiinnertik nukittorsarniarlugu
Tallimanngornermi maji ulluisa 21-anni Siumup siulittaasua, Erik Jensen aamma aaqqissuussaanermut siulittaasup tullia Inga Dora G. Markussen naapippaat Samfylkingin siulittaasua, Logi Einarson siulittaasullu ikiortaa Freyja SteingrimsdĂłttir. Ataatsimiinnermi siunertaasoq tassaavoq imminut ilisareqatigiinnerulernissaq partiilu ullumikkut sumiiffii ilisimatitseqatigiinnikkut paasissutissiisssutigissallugu nunanilu taakkunani ineriartorneq.
Ilisimatitseqatigiinneq
Samfylkingin siulittaasua, Logi Einarson, ilisimatitsivoq parti Islandip inatsisartuinut Althingimut, qinersisoqarnissaannik piareersaateqarluni ulapputeqarnerminnik, qinersineq septemberimi ingerlanneqassamaarpoq.
Qinersisartunik isumasiuinermi kingullermi misissuisarfik MMR tamanut saqqummiussaanni majip ulluisa 12-ani takuneqarsinnaavoq, Samfylkingin qinerisartut 10,9 procent-ii pisussaagai. 2017-mi qinersinermi partii 12,1%-innappoq illuatungiliuttuunikuullunilu massakkut naalakkersuisoqatigiinnut Sjálfstædisflokkurinn (Talerpiuniat) aamma Vinstrihreyfingin – Grænt frambod (Venstre-Grønne-kkullu).
Siulittaasoq oqaluttuarpoq silaannaq pitsaasoq qineqqusaartussallu amerlasuut qinersinissamut qilanaartut. Taamaattoq naatsorsuutigivaa qineqqusaarnissaq aatsaat aallartivissasoq junip qeqqata missaani inatsisartut upernaakkut ataatsimiinnerisa naalernerani.
Siumup siulittaasua, Erik Jensen, nunatsinni qinersinerup inerneranik ilisimatitsivoq naak 2018-imut naleqqiullugu 2,3 procent-imik siuariaraluarluta Inatsisartuni illuatungiliuttutut inissisimalersimalluta. Partimi aqutsisut maanna qinersisimaneq nalilersorlugu ingerlappaat nutaamillu periusissamik pilersaarusiulerlutik qinersinissap tullissaanut atugassamik.
Illuatungiliuttuuneq Samfylkingin misilittagaqarfigilluarpaa qinersinermi matumani siulianilu taamatut inissisimammata, taamaammat Logi Einarson oqaloqatigiinnermi siunnersuilluarpoq
Inuussutissarsiutitigut inerisaaneq
Ilisimatitseqatigiittoqareermat qulequttat assigiinngitsut eqqartorneqarput, s.a. aningaasaqarnikkut inuussutissarsiutitigullu politikki. Islandi Coronamit sakkortuumik nalaanneqarsimavoq takornariaqarnermi aalisarnerup saniatigut aningaasarsiorfigineqarnerpaavoq. Logi Einarson pingaartippaa inuussutissarsiornermiit isertitat assigiingisitaartinnissaat ilinniartitaanerlu nutaaliornerillu nukittorsarnerisigut inuiaqatigiinni naleqarnerulersitsinissaq anguniarlugu.
Logi Einarson aatsitassarsiorfiit qanoq qisuariaateqarsimanersut naalakkersuisunngortut urani pillugu inissisimanerat pillugu paasisaqarusulluni aperivoq. Erik Jensen nassuiarpaa, IA-p qineqqusaarutigisimagaa, Kuannersuarni aatsitassarsiornissaq in gerlaannartumik unitsinneqassasoq, aamma naalakkersuisunngortitsiniarnerluni isumaqatiginninniarnerup nalaanni IA’p piumasaqaatigalugu saqqummiussimagaat. Siumup tamanna piumanngilaa kissaatigalugulu VVM pillugu tusarniaalluni ingerlatsineq ingerlatiinnarneqassasoq. Paasivaalu suli tusarniaasoqartoq, tamannalu neriorsuisimanermik uniuilluinnarnerummat tusagassiuutit qinersisartullu qisuariassasut neriuutigaa. Aatsitassarsiornissaq eqqartorneqareermat, Erik Jensenip Nunatta aningaasaqarnikkut nalorninartumik inissisimanera pillugu nalunaarpoq, Nunarput suli aalisarnermit isertitanik pinngitsuuisinnaanngimmat.
Suleqatigiit isumaqatigiissutigaat assigiissuteqarpassuaqarlutik taamaattumik ilisimasanik paasissutisseeqatigiinnissamik aalisarneq nutarterinerlu pinerullugit toqqammavissagissaartugut, suleqatigiinnissallu ingerflaqqinnissaanni eqqartugassaqqittut.
Nunanut allanut politikki
Suleqatigiittaaq tikippaat Issittumi Siunnersuisoqatigiit ministeriisa ataatsimiinneranni qulequtaasimasut, ataatsimiinneq Reykjavik-mi ingerlanneqaqqammermat naalagaaffiit arfineq-pingasuusut nunanut allanut ministeriisa peqataaffigisaannik – nunap inoqqaavisa suleqatigiiffiilu. Inga Dora G. Markussen-ip pingaartippaa Issittoq pillugu Siunnersuisoqatigiinni suleqatigiinnerit ineriartornerat taakkualu suleqatigiissitaanni sulinerit malinnaavigeqqissaarneqartariaqarnerat. Inatsisartut aallaavigalugit suleqatigiiffik Nunarput, Island aamma Savalimmiut akornanni, Avannaamioqatigiit Killiit Siunnersuisoqatigiivi, suliassaqarput eqqumaffigisariaqagaminnik, Nunat Avannarliit Siunnersuisoqatigiivi Arktisk Råd-mi 2016-mi alapernaatsutut issiavilerneqarput. Samfylkingin Avannaamioqatigiit Killiit Siunnersuisoqatigiivisa siulittaasoqarfiani sinniisoqarput tamannalu pissutigalugu issittuni qulequtaasunut attuummassuteqarluarlutik. Arktisk Råd-imi oqaluuserineqartunut ilanngullugu suleqatigiit aamma tikippaat USA’p Nunattalu Kangerlussuarmi naapeqatigiillutik ataatsimiissimanerat, qanorlu pingaaruteqartigisoq nunanut allanut tunngasunut politikki ataasiusoq atussallugu. Nunatta Naalagaaffeqatigiit iluanni soorlu tamanna issittunut periusissatigut ersarissaleruttoraa.
Samfylkingin siulittaasuata ersarissarpaa, Islandimi inuiaat ikittunnguugaluarlutik nunanut allanut politikitigut ingerlatsinertik tamatumani naligiissitaaneq eqqissinerlu pillugit pingaartitsinertik ersarissartuarsimallugu. Eqqissineq pillugu Island-imiit ilungersuutigisimavaat oqaatigiuartarsimallugu, inuiaqatigiinni nunarsuarmioqataasuni Israelip Palæstinallu sorsunneranni  eqqisseqatigiittoqaqqullugu. Sapaatip akunnerani qaangiuttumi Islandermiut inatsisartui ersarissumik nalunaaruteqarput, Israel Palæstinalu ingerlaannartumik sakkulersuukkunnaarallarnissaat atuutileqqullugu.
Ilanngunneqarsinnaavoq Island Palæstina 1967-mi killeqarfilerngusaannermi nunarsuarmi siulersaallutik naalagaaffittut akuerimmassuk. Tamanna pivoq 2011-mi inatsisartut isumaqatigiilluarlutik taasissutigimmassuk, ataasiakkaat taaseqataanngikkaluarlutik. 2012-mi Palæstina Naalagaaffiit Peqatigiit akornanni ilaasortaanngitsutut alapernaatsutut akueraat, tamannalu naalagaaffittut namminiussuseqartutut akuerisaanertut paasineqassaaq.
Suleqatigiinneq annerusoq
Nunat ineriartorneri pillugit eqqartueqartigiinnerit saniatigut suleqatigiit tikippaat nunat marluusut akunnerminni qanilaarnerusumik suleqatigiinnissaat. Nunarput Islandilu pillugit Islandimi naalakkersuisut nalunaarusiaat Inatsisartuni piffissami aggersumi oqaluuserineqartusaavoq tassungalu atatillugu nunat pineqartut akornanni timmissartuussisarneq tikinneqarput.
Coronap nalaanni akornitsiunni silaannaatigut angallanneq ingerlanneqanngilaq immikkut ittumik pisoqartillugu attartuisoqartarsimanera eqqaassanngikkaanni. Inga Dora G. Markussen-ip neriuutiginerarpaa silaannakkut angallassinerit qanittumi aallartisaqqinneqassasut, Islandermiummi Corona pillugu aamma aqutsilluarput.
Ataatsimiinnermi akunneq ataaseq missiliorlugu sivisussusilimmi Erik Jensen siulittaasoqatini, Logi Einarson, qujassuteqarfigaa ataatsimeeqatiserinninnera pillugu kissaatigalugulu oqaloqatigiinnerit ingerlaqqissasut. Suleqatigiit isumaqatigiissutigaat suleqatigiinnertik nukittorsarniarlugu tamannalu pillugu attaveqaqatigiittarnerit nanginniarpaat, neriullutik Nunani Avannarlerni Sulisartut Kattuffiisa Suleqatigiiffianni, SAMAK-imi Norgemi ukiaru ataatsimeersuartoqalerpat naapissinnaassallutik.
Siumup aqutsisui Danmarkimi Socialdemokratit naapissallugit pilersaaruteqarput. Tamanna pillugu kingusinnerusukkut nutaarsiassaqarumaarpoq.