Kommune Qeqertalimmi sanaartornerup unittooqqanera assut pakatsinarpoq akuersaarneqarsinnaananilu. Kommunalbestyrelsip akuersissutigeriigai sanaartugassatut suliniutit arlallit, ukiut tamaasa kinguartinneqartarneri attanneqarsinnaanngilaq.
All.: Aqqa Samuelsen, Kommune Qeqertalimmi Siumut gruppiani siulittaasoq
Kommune Qeqertalik 2022-mi Sanaartornermut Iluarsartuussinermullu aningaasaateqarfimmik pilersitsivoq. Sanaartornermut aningaasaateqarfiup pilersinneranili 19,6 mio. kronit sanaartugassanut uninngasuutigineqarput.
Taakku kommunip 2022-mi naatsorsuutaani allassimapput. 2024-mi kommunip naatsorsuutaasa maannamut killiffianni sanaartornermut aningaasaateqarfimmi uninngasuutigineqartut 101,9 mio. kroninut qaffassimapput. Tamanna naammaginanngilaq. Aningaasat amerlasuut pineqarput. Taama amerlatigisunik ilaginnaaneq inuiaqatigiinnut kommunillu siunissami ineriartornissaraluanut kingunerluttussanngoreerpoq.
Sanaartugassatut suliniutit kinguarsarneqartut ilaatigut makku pineqarput: Meeqqat Illui Attumi Ikamiunilu, Kangaatsiami Ikerasaarsummilu aqqusinernik iluarsartuussinerit, Qasigiannguani ilaqutariinnut inissiat arfinillit, Qasigiannguani inissianik 20-nik iluarsartuussineq, Attumi umiatsialerivik, Aasianni krani, kalaalimineerniarfinnik nutarterineq, upalungaarsimanermi atortunik nutarterineq il.il.
Oqaluuserisassat amigartut
Kommune Qeqertalimmi sanaartornerup siuariartunnginnera naammaginanngilaq. Kommunalbestyrelse ukiut tamaasa 50 mio. kroninik sanaartugassanut missingersuusiortarnera ilumut piviusorsiortuunersoq apeqquserparput – sanaartornermi suliniutit siuariartortinneqartanngippata.
Naammaginanngitsut ilagivaat, ”sanaartorneq” immikkut qulequttatut qaqinneqarnianngimmat ulluni 28-29. august 2024, kommunalbestyrelse nunaqarfinnilu aqutsisut missingersuutit pillugit isumasioqatigiilerpata. ”Sanaartorneq” immikkut qulequttatut qaqinneqartariaqaraluarpoq. Soorunalimi ”sanaartorneq” immikkut qulequttatut qaqinneqarnissaa piumasarissavarput, kommunalbestyrelse nunaqarfinnilu aqutsisut missingersuutit pillugit isumasioqatigiilerpata.
Sanaartukkat naammassisat politikikkut nalilersorneqanngitsut
Kommune Qeqertalimmi sanaartornikkut suliniutit tamarmik pillugit sanaartornermut naatsorsuutinik tunniussisoqartussaavoq. Taamaattorli erseqqissaatigineqassaaq, sanaartornermut naatsorsuutit 2 mio. kronit sinnerlugit nalillit naammassineqarsimasut ilaat politikikkut suliassanngorlugit saqqummiunneqarsimanngimmata, tamannalu malittarisassanut aalajangersakkanullu atuuttunut naapertuutinngilaq. Tamanna kukkunersiuisut nalunaarutaanni 2021, 2022-mi aammalu 2023-mi tikkuarneqarpoq.
Kommunimiit neriorsuutigineqarpoq sanaartornermut naatsorsuutit siulliit 2 mio. kronit sinnerlugit nalillit 2024-mi ukiup affaanut suliarineqareersimassasut. Maanna 2024 ukiup affaa qaangiussimalerpoq, sulilu sanaartukkat 2 mio. kronit sinnerlugit nalillit naatsorsuutaannik saqqummiussisoqarani. Tamanna naatsorsuutigisatsinniit aammalu malittarisassat aaliangersakkallu malillugit naapertuutinngilaq.
Kommunip 2023-mi naatsorsuutai akuersissutiginnginnissaanut piareersimavugut, sanaartukkat 2 mio. kronit sinnerlugit nalillit naatsorsuutaat tamaasa takusimatinnagit.