All.: Qarsoq Høegh-Dam, Siumut Nuummi siulittaasoq
Siumumiit anguniagaq ersarippoq. Siumut Nuummiit eqqortoq nipangiunnavianngilarput, inuiaqatigut pigisaminnut oqartussaapput, allanngortoqartinnagu akuerineqarnavianngilaq.
Piumasaqaaterput sakkortuneruliinnartumik maanna anngupparput, minnerunngitsumik Royal Greenland aningaasanik atornera milliardilikkaanik annertussuseqalertoq qanittumi saqqummernera aallaavigalugu.
Aamma qanittumi tamanut ammasumik saqqummiunneqarpoq, Royal Greenland-inngooq Nunatsinni ”qullersaqarfeqarnerminik” oqarnera sumilluunniit piumasaqaateqanngitsoq nassuerutigineqarluni.
Tassani aamma saqqummiunneqarpoq, allaffeqarfitsik Svenstrup-imiittoq (Danmark), allaanngooq Nuummiit allaffimmiunik sulisoqarnerutikkaat, taavalu immikkoortortaqarfiit Nunanut allanut tunngagaluartut arlaqartut (Sverige, Tyskland, Norge, il. il.) tassani Svenstrup-imi angerlarsimaffeqartikkaat.
Akissuteqaammi inuiaqatigut pisortatut, atorfiillu pitsaanernut inississornissaannut, Royal Greenland sumilluunniit pilersaaruteqarsimannginnerani isiginnaartuinnanngortinneqarnerput akuerisinnaanngilarput. Nalunaarpummi piginnittuniit politikkikkut akuleruppata aatsaat iliuuseqarniarlutik. Qullersat taarsissapput.
Piumasaqanngikkutta susoqarnavianngilarooq. Sakkortunerpaamik piumasaqassaagut.
Pinnguarneq naammaleqaaq, allanngortoqassaaq. Siulersuisut piumasaqaateqanngillat suliassatillu nammassinnaanngilaat, tamaavimmik 9. maj taarsertariaqarnerat avaqqussinnaajunnaarpoq.