Allattoq Kim Kielsen, Siumut sinnerlugu Inatsisartunut ilaasortaq.
Nunarput ineriartortinneqartariaqarpoq. Taamatut neriorsuuteqarsimanerput tamatta akisussaaffigaarput. Qineqqusaarnerup nalaani partiit tamavimmik Qaqortup Narsallu akornanni mittarfiliortoqarnissaa sanaartorneqassasoq neriorsuutigineqarmat tulluusimaarpunga, taamaattoq arlallit, Kujataata tamarmi ineriartortinneqarnissaa pisariaqartinneqaqisoq pillugu kivitsinissamik, qineqqusaarnermi neriorsuutiminnik qimarratiginninniarnerat takullugu pakatsivunga.
Isertugaataanngilaq mittarfiliorneq akisoorujussuusoq, aningaasarpassuarnillu naleqarluni. Taamaattoq mittarfiit ukiut 50-it 100-llu tulliuttut atorneqarsinnaasussaapput.
Inuppassuit puigortarpaat mittarfiit aamma isertitaqaataasussaammata, suliffeqarfinnik pilersitsillutik kiisalu ilinniarfinnik pilersitsillutik. Tamannalu nunatta ineriartortinneqarnerani pisariaqartinneqarpiarpoq.
Qaqortup Narsallu akornanni mittarfissatut pilersaarutigineqartoq sananeqartariaqarpoq, Kommune Kujallermi inuussutissarsiornikkut tunaartarisat tamarmik allanngortinneqartussaammata, tamannalu ukiuni qulikkaani arlalinni utaqqineqarpoq.
Piffissami kingullermi tusagassiutitigut nalunaarutigineqarpoq mittarfik 1 mia. kr.-it sinnerlugit akeqassasoq, ilaasalu apeqquserpaat ilumut tamanna akissaqartinneripput? Tassunga qussalasumik akisariaqarpunga AAP! Akissaqanngilagut sananngitsoornissaanut.
Nalunngilarput mittarfiit takornariartitsinerup annertunerulerneraniit iserititassanik nutaanik pilersitsiumaartut, naak ilisimanngikkaluarlugu takornarissat qanoq amerlatigisut takkuttalerumaartut. Mianersortorujussuarmik isertitassatut appasinaarlugit missingiusiortoqarnikuuvoq, tamannalu peqqutigalugu mittarfiit akisunerusussatut isikkoqalerlutik.
Pingaaruteqarpoq eqqaamassallugu Kommune Kujallermi Dash-8-nut mittarfimmik naatsumik sanasoqarpat takornarianik kommunimut tikittartunik amerlisaasoqarnavianngitsoq 1499 meterimik takissusilimmik mittarfiliornermut sanilliullugu, taamatullu aalisakkanik assigisaanillu nioqqutissianik amerlanerusunik nassiussuisoqarsinnaanani.
Aningaasatigut sipaartoqartalissaaq aamma kiffartuussinissamut isumaqatigiissutit, unnuinerit piffissamillu annikinnerusumik atuisoqartalissammat angalanermut. Soorlu oqaatigineqareersutut takornarissat amerlanerusut tikittalernerat aammal inuussutissarsiornikkut periarfissat amerlanerat ineriartornermik annertunerusumik nassataqassaaq isertitassallu qaffallutik.
Mittarfik akilerneqareerpat ukiut 50-it tulliuttut sinnerlugit nunarput aningaasanik isaatitsilissaaq.
Kommune Kujalleq ineriartortinneqartariaqarpoq inuerusarunnaarlugu, taamaattumik misissuinerit amerlanerusut pinnagit sanaartugassat aallartisarneqarniarlik, taamaasilluta mittarfik 1499 meterinik takissusilik sanaartulerlugu.
Kommune Kujallermi ilisimaneqartariaqarpoq Siumup mittarfiliortoqarnissaa aalajangiusimammagu, nunatta atortorissaarusersornera attavilersorneqarneralu nunatta ineriartortinnissaanut pingaaruteqarmat.
Naalakkersuisut kaammattorusuppakka Kommune Kujallermi 1499 meterinik takissusilimmik mittarfimmik sanasoqarnissaa aalajangiusimaqqullugu, taamatullu sanaartorneq maannakkut aallartinneqassasoq, tassami mittarfik sananeqanngippat kommuni ukiuni tallimani-qulini tulliuttuni aningaasalersuisoqarnissaa annaaneqassappat inuit nalorninertik peqqutigalugu allamut nutsilertussammata, tamannalu kissaatiginanngilaq.
Siumumiit mittarfiup sananeqarnissaanut aningaasanik nassaarniarnermut peqataarusuppugut, sanaartorneq piviusunngortinneqarniassammat.