Innarluutilinnut tunngaviusumik inuttut pisinnaatitaaffiit oqaatsit kusanarluinnartut atorlugit inatsisartunit suliarineqarsimasut isiginnaaginnartarpagut. Pisinnaatitaaffiit atuutsinneqannginnerat, ilaannakortumik ikiorsiisarneq, ikiorsiinaveersaartarnerlu Danmarkimut nuuinnartariaqartarnermut tunngaviusarput.
All.: Paarnannguaq Mathiassen, siulittaasoq, Siumut Ilulissat
Tusartuarparput takujuarlugulu nunatsinni inunnik innarluutilinnik sullissinermi sumiginnaaneq pissutigalugu ilaqutariit kajumissuserinngisaminnik Danmarkimut nuuttariaqartartut pisinnaatitaaffitik atorlugit sullinneqassagunik. Nunatsinnimi inuit innarluutillit naleqartinneqaratik sullinneqartuarmata, uagut inuiaqatigiittut isiginnaartuuffigisagut.
Inuiaqatigiinni inatsisilimmi inuuvugut, tamatumanilu tamatsinnut naapertuilluartumik pineqarnissarput qulakkeertussaavaa. Soorlu tamat oqartussaaqataanerput pillugu qinersisartugut.
Tamat oqartussaaqataanerat tassaavoq inuinnaat nunami maani naalakkersuisooqataanerat / aqutseqataanerat, tassa pissaanermik tunniussisarpugut qinersinitsinni, pisaanerlu taanna amerlanerussuteqartuni inissisimasarluni.
Isumaqarpunga pisortat inunnik innarluutilinnik sumiginnaanerat pissutigalugu nunaqqaterpassuagut Danmarkimut nuullutik aallaannartariaqalertartut, tamannalu allanngortinneqartariaqarpoq.
Inatsisit atuutsinneqartussaapput
Pisinnaatitaaffiit atuutsinneqannginnerat, ilaannakortumik ikiorsiisarneq, ikiorsiinaveersaartarnerlu Danmarkimut nuuinnartariaqartarnermut tunngaviusarput. Pisinnaatitaaffiit pisussaatitaaffiillu atuutsinneqartussaapput taakkualu malillugit pisortat sullissisussaallutik. Erseqqissarusuppara pisortat inunnut innarluutilinnut sullissinerminni kiffaanngissusiiaaqqusaanngimmata, inuk innarluutilik pineqaatissinneqarsimanngippat imalt. eqqartuunneqarsimanngippat inatsimmik unioqqutitsilluni.
Inuttut kiffaanngissuseqarneq illersorneqartussaavoq aamma inuit innarluutillit pineqartillugit. Inuit pinerluuteqarsimanngitsut nunami maani naalagaaffiup Danmark ataani inuttut kiffaanngissuseqarlutik inuunissaat pissaanerup pingasunut agguarneqarsimanerani inatsisitigut toqqammaveqarmat taakkualu malinneqartussaammata.
Qularutiginagu taamaassorinninnermik aallaaveqanngitsumik oqassaanga pissutsit qulaani allatakka ilumoortut nammineerlunga naqissusersinnaagakkit, innarluutilimmik meeraqarnera pissutaalluni. Kommunerisatsinnit tapersersorneqannginneq ikiorneqannginnerlu ukiorpassuarni naammagittarluta atorsimagatsigu.
Pisortanut illuatungiliuttussatut inissisimasussaanngilagut
Inunnut innarluutilinnut angajoqqaat aammalumi qanigisaasut pisortanut illuatungiliuttunngortinneqartarnerat allanngortinneqartariaqarpoq. Inuit innarluutillit pisinnaatitaaffiisa aammalu pisortanik sullinneqarnermi inatsisitigut periarfissanik siunnersorneqarlutillu ilitsersorneqartarnissaat qulakkeerneqarsinnaasariaqarpoq, qulakkeerneqarsinnaanngippallu isiginnaaginnarani tusarnaartuuinnaranilu qulaaniit akuliuttoqartarnissaa pisariaqarluinnarpoq.
Innarluutilinnut tunngaviusumik inuttut pisinnaatitaaffiit oqaatsit kusanarluinnartut atorlugit inatsisartunit suliarineqarsimasut isiginnaaginnartarpagut.
Inuiaqatigiit kalaallit inunnut innarluutilinnut isiginnittaasiat aammalu pisortat inunnut innarluutilinnut isiginnittaasiat allanngortariaqarput. Inuit innarluutillit pitsaasumik inuussappata inunnut innarluutilinnut isiginnittariaaseq allaanerusoq pingaarnersiuinerlu salliullugit sulissutigineqartariaqarput.
Inuit innarluutillit pillugit politikikkut anguniakkat ataatsimoorfigineqartariaqarput. Innarluutillit pillugit anguniakkat ataatsimoorussat suuppat? Takorluukkat suuppat?
Qammarsuaq nikisikkuminaatsoq
Nukiit piusut atornerlunneqartuarnerat ullumikkumiit unitsinneqartariaqarpoq. Inunnut innarluutilinnut angajoqqaajusut taakkununngalu qanigisaasut nukissaarunneq pissutigalugu Danmarkimut nuuttarnerat unitsinneqassappat. Aammalumi inuit innarluutillit maani nunatsinni asuli pineqarnerat unitsinneqassappat.
Nunatsinni inuit innarluutillit pillugit aaqqissuussaaneq qiviaannaraanni, ukiorpassuarni qammarsuartut nikiseriagassaanngitsutut ippoq. Sooruna inunnut innarluutilinnut isiginnittariaaseq allanngortikkumaneqanngitsoq? Kinaluunniit inuunermini innarluutilimmik meerartaarsinnaavoq aamma kinaluunniit inuunerup ingerlanerani innarluuteqalersinnaavoq.