Pisortani allaffissorneq

Pisortat allaffissornerat kalaallit oqaasii atorlugit ingerlanneqassaaq — innuttaasullu sulinermi salliullutik inissisimassapput.

Nunatsinni pisortat allaffissornerat oqaatsivut atorlugit ingerlanneqassaaq.

Pisortat allaffissorneranni sulisorisat katitigaanerat qaqugukkulluunniit nunami innuttaasut katitigaanerannut naapertuuttumik aaqqissuunneqassaaq. Taamatut inissisimalernissaq anguniarlugu pisortat allaffissorneranni sulisorisat katitigaanerat pillugu misissuisoqassaaq, sumi pitsanngorsaasoqartariaqarnersoq paaseqqissaarumallugu.

Naleqqussaasoqarfiusariaqartuni tamani kalaallit Nunaannut naapertuuttumik amerlassuseqartut atorfinitsinneqarnissaannut pilersaarusiortoqassaaq, aporfiusinnaasut piiarlugit, piginnaanngorsaanerillu pisariaqartinneqartut pilersillugit.

Nunatsinni pisortani allaffissornikkut aammalu nutserinertigut aningaasartuuteqartarneq annertooq, suli maannamut appariartunngitsoq, annikillisinniarlugu aaqqissuussinernik ingerlatsisoqassaaq. Tamatumani Namminersorlutik Oqartussani naalakkersuisoqarfinnilu assigiinngitsuni pisortanik atorfinitsitsinerni inuiaqatigiinnik ilisimasaqarneq, naleqartitanik oqaatitsinnillu piginnaasaqarlunilu ilisimasaqarneq salliutillugit nalilersuinermi tunngavigineqartassapput.

Nutserinermut atortut inuiaqatigiinnit aningaasalersorlugit inerisarneqarnikut qarasaasiatigut, innuttaasunut tamanut ammasumik periarfissiissutigineqassapput. Taamaaliornikkut innuttaasut akunnerminni allattariarsornikkut aamma paaseqatigiilluarnerunissaat anguniarneqassammat.

Pisortat suliffeqarfiutaasa naqitertittagaat nunatsinni naqitertinneqartassapput.