Peqqinnissaqarfimmi naligiimmik atugassaqartitsineq

Nunatsinni peqqinnissaqarfimmi naligiimmik atugassaqartitsisoqassaaq

Nunatsinni ukiumut kalaaleqatigut amerlavallaat nappaatinik toqussutigineqartartunik toqussuteqartarput, Danmarkimi najugaqaraluarunik anigorsinnaasimasaraluaminnik. Taama Najaaraq Møller Siumumit Folketingimut qinigassanngortittoq isumaqarpoq, naalagaaffeqatigiinnermi peqqinnissaqarfimmi pitsaanerusunik naligiinnerusumillu atugassaqartitsinissaq sulissutiginiarpaa.  

“Ullumikkut kalaallit amerlasuut ukiut arlallit suliaritinnissartik utaqqisariaqartarpaat, Danmarkimi napparsimasut amerlanertigut sapaatit akunneri ikittunnguit ingerlanerinni suliaritissinnaasarput. Assigiinngissuseq angivallaarpoq,” Najaaraq Møller oqarpoq.  

Taanna isumaqarpoq ataatsimoornerup isumaa tassaassasoq innuttaasut pisinnaatitaaffimmikkut periarfissatigullu assigiinnik atugassaqartinneqassasut – tamanna aamma peqqinnissatigut atuuppoq. Tamannalu isumaqanngilaq Nunarput Danmarkimut pituttornerulissasoq, killormuuanik Danmarkip pisussaaffigereerpaa innuttani naalagaaffimmi naligiimmik pineqarnissaat.

“Ataatsimoorfigisap iluani inuit tamarmik assigiimmik pisinnaatitaaffeqarlutillu periarfissaqartartussaapput – aamma naalagaaffeqatigiinnerup iluani,” oqarpoq.

Taamaattumik Kalaallit Nunaanni peqqinnissaqarfiup annertunerujussuarmik pitsanngortinnissaa sulissutiginiarpaa, Danmarkillu Danmarkimi atugassarititaasut assigalugit peqqinnissatigut angusaqartoqarnissaa qulakkeerniarlugu annertunerusumik tapersiisarnissaa sulissutigerusullugu. Rigshospitalimut suliaritikkiartortarnissamut aqqutissiuisoqaannarani sineriak tamarmi peqqinnissaqarfikkut pitsanngorsarneqassasoq anguniarneqassaaq.

“Kalaallit Nunaanni peqqinnissaqarfik pitsaanerusoq pisariaqartipparput. Tamanna aningaasaliissutinik, suleqatigiinnermik Danmarkillu annertunerusumik tapersiineranik pisariaqartitsivoq. Tamanna Folketingimi sulissutigissavara,” Najaaraq Møller oqarpoq.