Nuup kangerluini kilisaatersorluni aalisarneq akuerinngilarput
Siullermik Aalisarnermut, Piniarnermut, Nunalerinermut Imminullu Pilersornermut
Naalakkersuisumut apeqqut: “Nuup kangerluini saarullinnik qalorsorluni kilisalluni aalisarnerneq
susassaqartut isumasiunngilluinnarlugit aamma inatsisinik tunngaveqarluni akuerineqarpa?”
Matumuuna Siumut sinnerlugu kommuneqarfik Sermersuumi Aalisarnermut Siunnersuisooqatigiinnut
ilaasortatut tupigaara suut tunngavigalugit taamatut kangerluni qalorsorluni kilisalluni
saarullinniarnissamut akuersissummik tunniussisoqarsimanera.
Tassami Kommuneqarfik Sermersuumi ataatsimiitsitaliami susassaqartumi kangerlutsinni kilisalluni
saarullinniarnissamut tunngassutilinnik isumasiorneqarsimanngilagut, taassuma saniatigut sinerissap
qanittuani aalisaartut peqatigiiffii aamma isumasiorneqarsimanngillat.
Nalunngilarput Nuup kangerluini bundgarnersorluni uumatitsivilersorluni saarullinni aalisarneq annertusoq,
taassuma saniatigut aamma ningittagarsorluni aalisarneq ingerlanneqarluni. Tamannalu kommunemi
Aalisarnermut siunnersuisooqatigiinni eqqumaffigaarput piujuartitsinissamik aallaavilimmik
ingerlanneqarnissaa nalilersortuassallugu kommunetsinni siunissaq eqqarsaatigalugu kangerlutta
saarulleqartuarnissaa soqutigisarigatsigu.
Ilisimavara kommunemi aalisarnermut siunnersuisooqatigiit peqatigiiffinnik tunuliaqutaqarlutik
piujuartitsinissaq aallaavigalugu ileqqoreqqusaliornerit ingerlakkaat, suliat tamakku siunissamut
iluaqutaasussat qulaatiinnarlugit Aalisarnermut, Piniarnermut, Nunalerinermut Imminullu Pilersornermut
Naalakkersuisoqarfimmiit qalorsorluni kilisannissamut il.il. akuersissutinik tunisiinnartoqartassappat taava
qanoq ataqatigiissaakkamik piujuartitsinissaq sinerissallu qanittuani aalisartunik illersuinissaq
angussagatsigu?
Taamaammat eqqumiigaara Aalisarnermut, Piniarnermut, Nunalerinermut Imminullu Pilersornermut
Naalakkersuisoqarfimmiit taamatut qalorsorluni kilisalluni saarullinniarnissamut akuersissummik
tunisiinnartoqarsimanera, annerusumik susassaqartunut tusarniaanermik isumasiuinermilluunniit
tunuliaqutaqanngitsumik?
Nalunngilarpummi sinerissap qanittuani 3 sømil iluani qalorsorluni kilisalluni saarullinniarnissaq inatsisitigut
tunngavissaqanngitsoq imaluunniit allannguisoqarami?
Aalisarnermut inatsimi Kapitali 11,
“Inuussutissarsiutigalugu misileraalluni aalisarneq” tassannga tunngaveqarsimappat taava
misileraanissamut tunngaviusut saqqummiunneqarpat aamma naak pisortatigoortumik nalilersuinerit
saqqummiunneqartussat? Aamma taakku sumi qanorlu takussutissaqarpat?
Inatsisartutlov nr 29 af 23_05_2024
Qulaani tunngavilersuutikka aallaavigalugit kissaatigaara Aalisarnermut, Piniarnermut, Nunalerinermut
Imminullu Pilersornermut Naalakkersuisoq aamma Inatsiartuni Aalisarnermut Piniarnermullu
Ataatsimiitsitaliaq nassuiaateqartariaqartut.