Nuunnermi akileraaruteqartarnissap kalaallit suliffeqarfiutillit innarliinnginnissaq qulakkeertigu

All.: Erik Jensen, Inatsisartuni gruppip siulittaasua

Inatsisartuni nuunnermi akileraartarnissamut siunnersuutip nunatta avataani suliffeqarfiutilinnut suliffeqarfinnullu ullumikkut nunatta avataaniit aqunneqartunut sanilliullugu Kalaallit Nunaanni suliffeqarfimmik, inuussutissarsiortunut namminersortutut pilersitsisimasunut innarleeratarsinnaavoq. Taamaattumik Siumut sinnerlugu Inatsisartuni ilaasortatut peqqutissaqalersippaanga ernumassuteqarnissamut.

Tusagassiuutini takuneqarsinnaalereersutut, inatsimmut siunnersuutip maannamut isikkua eqqarsaatigalugu isumaqarpoq, Kalaallit Nunaanni suliffeqarfiit pitsaasumik ingerlalluartut matusariaqalersinnaanerat, tassami assersuutigalugu piginnittoq utoqqalinersiaqalerluni suliunnaarnissani kissaatigippagu, Kalaallit Nunaannilu pisissussamik soqutiginnittoqarani.

“Suliffeqarfiit nunaqavissunit kinguaariinni arlalinni ingerlanneqarsimasut pillarnissaannut periarfissiineruvoq. Tamanna ilumoorsinnaanngilaq, kalaallit suliffeqarfiutaasa illersornissaat illuanilu avataaniit pigineqartunit atugassarititai annikinnerusinnissaat sulissutigisussaanngilarput.” Erik Jensen, Siumumeersoq oqarpoq.

Pitsaasumik ingerlalluartumillu inuussutissarsiuuteqarneq Kalaallit Nunaanni atugarissaarnermut pigissaarnermullu tunngavissatut naatsorsuutigineqartarput. Siumumi isumarput malillugu nunaqavissut piginninnerannut kinguaariillu nikinneranni sinaakkutaasa toqqissisimanaartuunissaannut naapertuunnissaannullu politikkikkut qulakkeerinninnissaq suliassaavoq – ajornarnerulersitsinani.

“Taamaattumik akileraartarnermut inatsimmut allannguutissatut siunnersuuteqarniarpunga, siunnersuullu Inatsisartut upernaamut ataatsimiinnermi oqallisigissatigu. Siunnersuutissara akileraarnermut inatsisinut ilisimatuut ilaat suleqatigalugit suliaavoq, tassanilu siunertat suli pitsaanerusumik naammassineqarsinnaanissaat qulakkeerumallugu; aningaasat nunatsinniit akileraarutitaqanngitsumik nuutsinneqarnissaat pinngitsoortinniarlugu.” Erik Jensen, Siumumeersoq oqarpoq.

Siunnersuut Aningaasaqarnermut Akileraartarnermullu Ataatsimiititaliap ataatsimiinnerani piffissami aggersumi oqaluuserineqarluni suliarineqassaaq.

Akileraarnermut akisussaaffilimmik politikkeqarnissaq tapersersorparput. Tamannali naapertuisuussaaq. Inuiaqatigiit akileraartarnikkut akisussaaffimmik sumiginnaasoqannginnissamut illersortariaqarpagut – tassanilu nunaqavissut inuussutissarsiuuteqarneranik illersuinissarput aamma ilanngullugu. Siumumiillu pitsaasumik allannguutissatut siunnersuummik suliaqassaagut, qulakkeerumallugu kalaallit suliffeqarfiutai illersorlugit, avataaneersut suliffeqarfiutaannut periarfissaritinneqartut assinginik periarfissaqarnissaat, tassani akileraartarnermut aamma inuiaqatigiit aningaasaqarnerat attatiinnarneqarnissaa eqqarsaatigalugu.