Ullumi novemberip 28-ani Nuummi mittarfik ammaanersiorneqarpoq. Ullaakkut Atlantikoq qulaallugu timmisartoq toqqaannaq Nuummukartoq Københavnimiit aallarpoq, aallannginnermilu ikiartortorfiup saavani tamanna malunnartinneqarpoq. Ammaassut ilagaat Naalakkersuisunut siulittaasuusimasoq, suliniutillu piviusunngortinneqarsinnaaneranut siuttuusimasoq, Kim Kielsen.
Ammaanersiorneq Air Greenlandimit aaqqissuunneqarsimasoq aallariartortunut kaffillernermik kaagillernermillu ilaqartoq persuarsiorluni oqalugiarnernik ilaqarpoq, oqalugiartuuppullu Air Greenlandip pisortaa Jacob Nitter Sørensen, Naalakkersuisut Siulittaasorisimasaat Naalakkersuisorlu Kim Kielsen, Danmarkip nunanut allanut ministeriat Lars Løkke Rasmussen aamma Danmarkip aningaasaqarnermut ministeriat Nicolai Wammen.
Kim Kielsenip oqalugiarnermini tikippaa, ulloq manna oqaluttuarisaanermut ilaalersussaasoq, namminerlu nuannaarutigalugu Københavnimiit Nuummut toqqaannaq timmisartuussinissaq siulleq nalliussillugu najuussinnaagami.
– Ulloq tassaavoq tamatsinnut tulluussimaarnarlunilu pissanganartoq, Nunatsinnullu piffiit nutaat atuutsilerneranik ersersitsisoq, aamma nunarsuarmioqatitsinnut ammaassinerusoq. Ullumi taamaallaat pineqanngilaq nunap assingani aqqut nutaaq. Pineqarpoq akunnitsinni ikaartarfilersuineq. Pineqarpoq inuiattut allanut qaninnerusumik attaveqalernissarput – nunat akornanni, kulturikkut aningaasarsiornikkullu. Maanga pinissarput sivisuumik angalanerusimavoq – angalaneq siunertalersuinernik annertuumik imaqarsimasoq, sulinermiittoq aamma suleqatigiinnermiittoq, Kim Kielsen oqalugiaammini tusarnaartorpassuarnut ilaatigut oqarpoq.
Ilanngullugit qujassuteqarfigai siunertamut upperinnillutik sulisimasorpassuit, politikerit, Greenland Airportsikkormiut, Air Greenlandikkormiut allallu tamarmik suliniummut piviusunngortitsiniarlutik peqataalluarsimasut. Immikkullu eqqaavai teknikerit, siunnersortit sanaartortullu.
– Ilissi sulisimanissi ullumi maani nikorfasinnaanngortippaatigut. Ullumilu angalaffissarput periarfissanik nutaanik tunniussaqassaaq. Nunatsinnut isumaqarpoq nunarsuarmioqatitsinnut tikikkuminarnerulissasugut – Nunatta pinngortitarsua taamaallaat pinnagu aamma kulturerput pillugu, minnerunngitsumillu suleqatissarsiorlutik aningaasaliissuteqariartorlutillu takkuttartussat ilanngullugit. Danmarkimut nunarsuarmioqatitsinnullu isumaqassaaq, Nunarput tikikkuminarnerulissasoq aamma inuit akornanni qaninnerusumik attaveqaqatigiilernissaq nukittorsarneqassasoq, Kim Kielsen oqarpoq.
Nammineq isumaqarpoq angusaq tamatta tulluusimaarutissarigipput, eqqaamassagippullu aallarniutaannaammat. Siunissaq periarfissanik ulikkaartoq unnerpaa, namminerlu qilanaarpoq takussallugu, timmisartuussisarnerit imaattut qanoq ineriartornermut, suleqatigiinnermut peqatigiinnermullu tunniussassaqarumaarneranik.
Naggasiutigalugu Kangerlussuarmi sulisimasorpassuit eqqaallugit qujassuteqarfigai.
– Pinngitsoorumanngilanga inuppassuit Kangerlussuarmi sulisimasut tamaasa qujaffigissallugit. Ilissiuvusi inuiaqatigiinnut annertuumik tunniussaqarsimasut, neriuppungalu siunissami suliffigiligassassinni iluatsitsilluarumaartusi. Nalunngilara ilarpassuasi ilaatigut Nuummi sulilereersimasut, Kim Kielsen oqarpoq nangillunilu:
– Soorunami ilissi ullumi angalaqataasussaasusi tamassi aamma qujassuteqarfigiumavassi. Oqaluttuarisaanermut allanngueqataavusi. Ullumi Nuummut tikikkutta, Nunatta illoqarfiat pingaarneq appakaaffigissavarsi – piffiit nutaat appakaaffigissavasi. Ulloq tulluussimaarluta nuannaarlutalu atortigu. Suleqataasimanissinnut, tapersersuisimanissinnut upperinnissimanissinnullu qujanaq – peqatigiilluta nutaanik periarfissanik pilersitsivugut. Tamaavissi tamassi, angalalluarnissassinnik kissaappassi, Kim Kielsen naggasiivoq.
Københavnimiit aallalernermi nuannersumik katerisimaartoqarpoq, ataanilu assit qimerloorsinnaavatit.
