Nunatsinni politeeqarneq
All.: Erika Baadh Nielsen, Folketingimut qinigassanngortittoq
Oqartussaaffiit tigunngisagut ilagaat politeeqqarneq. Politiit toqqisisimanissatsinnut pingaaqqimmata nunatsinni politiit atugarisaat pitsanngorsarnissaat pingaaqaaq. Folketingimi suliassat pingaarluinnartut ilagaat nunatsinni politeeqqarneq qiviassallugu.
Sineriatsinni politeeqarneq eqqarsaatigigaani maluginiagassaavoq kalaallisut oqaaseqanngitsut amerlammata. Kiffartuusassat amerlasuut danskisut oqaaseqanngillat. Akissarsiat assigiinngissimanerat atukkallu sakkortusarsinnaanerat peqqutaaqataasimassaaq kalaallit politiit allani atorfinittarnerat. Inuillu ikikkatta immitsinnut ilisarisimasarluta sakkortuunik pisoqartillugu kalaallit politiinut qaavatigut ilungersunartarsimassalluni.
Nalunngilarput inuiaqatigiinni politiit qanoq atorfissaqartigisut amerlanerunissaallu kissaatiginartigisut, kisitsisit isigigaani persuttaasarnerit, kinguaasiutitigut atornerluisarnerit, pinnerlunnerit, ujaasisarnerit, annaasiniartarnerit minnerunngitsumillu ikiaroornartumik eqqussuinerit initullutik.
Ikiaroornartumik atuineq inuiaqatigiinni ajornartorsiutit annertuut ilagaat. Inuiaqatigiinni kalluakkat amerlammata; meeqqanik arsaarinnittarneq inuttut nalituinnarnani aamma aningaasartuutit annertuut ilagaat. Amerlasuutigut arsaarinnittarnermi ikiaroornartoq ilaasarmat. Inuussuttortagut sulinngitsut qiviarsaani amerlasuutigut ikioroornartumik atuisuunertik nukillaarsaatigisarpaat.
Ikiaroornartoq inuiaqatigiinni nukillaasaatsitta anertuut ilagaat, pingaartutut iliuuseqarfigisassaq. Mittarfissuit atulerneranni aamma ikiaroornartumik sakkortuunik atuineq tusassaagaluttuinnalerpoq, inuusuttortatsinnik allaammi meeqqarartatsinnik aserorterisut qiviartariaqalikkat.
Nunatsinni ikiaroornartumik eqqussuinernut nakkutilliineq sakkortusartariaqarpoq, ukiorpassuarni eqqussuineq milliartunngimmat. Paasisitsitiniaaneq ikiaroornartup sunniinerluutaanik ersarunnerusariaqarpoq.
Danskit oqartussaaffitsik tamanna iluamik isumaginissaat Folketingimi suliassatta pingaartut ilagaat inuiaqatigiittut nukillaarsaaatitta annertuup akiorniarnissaanut.