Nunatsinni nunaqarfinni innuttaasut inatsisitigut illersugaanerat nukittorsarneqassaaq

All. Doris J. Jensen, aaqqissuussaanikkut siulittaasup tullia folketingimullu qineqqusaartoq

Toqqissisimaneq kiisalu inatsisitigut illersugaaneq illoqarfimmiikkaanni imaluunniit nunaqarfimmi pisariaqarpoq. Ullumikkut nunaqarfinni amerlasuuni kommunefogede ataasiinnaq sulisarpoq? naak marlunnik kommunefogedeqarnissaq periarfissaagaluartoq amerlasuutigut inuk ataaseq kisimiilluni najukkami taamatut sulisarpoq qulakkeerniarlugu nunaqarfimmi eqqissimatitsinissaq.

Tamanna inummut ataatsimut akisussaaffiuvoq angisooq, aammalu toqqissisimannginnermik pilersitsisinnaalluni, pingaartumik arnat innuttaasullu allat sanngiinnerusut illersorneqarnissaat eqqarsaatigalugu. Taamaattumik isumaqarpunga politikkikkut qulakkeertariaqaripput nunaqarfinni ataasiakkaani minnerpaamik kommunefogede marluk atorfeqarnissaat, tassami inuit marluk suleqatigiikkaangamik, isumannaallisaanermut, sulinermi atugassarititaasunut kiisalu najukkami toqqissisimanermut iluaqutaasarpoq.

Peqatigisaanilli tunuarsimaarnermut aamma pissutaasarput atugassarititaasut ass.: Akissarsiat qaammammut akileraarutit kingorna 3.000 kr.-it sinnerlugit annertussuseqartarput, taamaattumik isertitat akisussaaffimmut taamak annertutigisumut naleqqunnersut nalilersoqqinneqarsinnaapput. Ajornartorsiutaasoq alla tassaavoq oqaatsit. Nunaqarfinni innuttaasut amerlasuut kommunefogeditut atorfininnissaminnut tunuarsimaartarmata, qallunaatut oqalussinnaaneq aporfigalugu.

Tassami Nuummi qullersaqarfimmi danskisut oqaatsit annertuumik atorneqartarput. Malitsigisarpaa najukkami innuttaasut piukkunnaatillit ilisimasaqartullu qinnuteqanngitsoortarnerat. Taamaattumik isumaqarpunga tamanna aaqqiivigineqartariaqartoq qullersaqarfimmi kalaallisut oqaasilimmik attaveqaammik inissiinikkut soorlu kommunefogedit pisariaqartitsillutik saaffigisinnaasaannik.

Nunatsinni pinerlunneq ajoraluartumik qaffasippoq. Taamaattumik pingaaruteqarpoq kommunefogedinut atugassarititaasut pitsaasumik pisariaqartitaannullu naleqquttumik aaqqiinissaq. Kommunefogedit aaqqissuussaanerat suli Danmarkip ataaniippoq. Taamaattumik oqartussaasut qallunaat aamma annertunerusumik akisussaaffeqartariaqarput atugassarititaasut pitsanngorsarnissaannut.

Nunaqarfinni innuttaasut toqqissisimanissamut kiisalu inatsisitigut illersugaanissamut allatulli pisinnaatitaaffeqarmata. Folketingimut qinigassanngortittutut sulissutigissavara:

• nunaqarfinni tamani minnerpaamik kommunefogede marluk inuttalerneqarnissaat

• akissarsiat sulinermilu atugassarititaasut pitsaanerusut

• kalaallisut oqaasillit kommunefogeditut atorfinissinnaanissaat

• nunaqarfinni inatsisitigut illersugaanerup nukittorsarneqarnissaa Toqqissisimaneq nunami sumi najugaqarnerup apeqqutaasariaqanngilaq.