Nunarput nammineq nunanik allanik oqaluussaqarnissamut pisinnaatitaavoq
Kingullertigut danskit tusagassiuuteqarfiisigut amerikarmiut qallunaat avaqqullugit nunatsinnik naapitsiniarsimanerat eqqartorneqartoq Siumumut qisuariartitsivoq. Maluginiarnanngitsuunngilaq suut qulequttat pillugit amerikkarmiuniit naapitserusuttoqarsimanera nassuiaatigineqanngikkaluartoq ingerlaannaq Kalaallit Nunaannut pingaarutilinnut nunanut allanut sillimaniarnermullu tunngasunik eqqartuisoqartillugu Kalaallit Nunaat Danmarkilu tamarmik peqataasassanerat ileqquunerarlugu innersuussisoqarmat.
Siumup naqissusissavaa: Kalaallit Nunaat danskit nunanut allanut politikkianut maleruutiinnartussiaanngilaq. Nunarput nammineq akisussaaffiit tigoreersimasat pineqartillugit isumaqatigiinniarsinnaatitaavoq namminerlu nunat suleqatigerusutani peqatigalugit illugiittumik toqqaannaq isumaqatigiissuteqarsinnaatitaalluni.
Namminersorneq pillugu inatsimmi § 12, imm. 1-mi paatsuugassaanngitsumik allaqqavoq Naalakkersuisut naalagaaffik sinnerlugu nunanik allanik aamma nunat tamalaat akornanni soqutigisaqaqatigiiffinnik isumaqatiginninniarsinnaapput isumaqatigiissuteqarsinnaallutillu inatsisit inuiannut tamanut tunngasut pillugit, tassunga ilaatillugit aqutsinermut tunngatillugit isumaqatigiissutit Kalaallit Nunaannuinnaq tunngasut, aamma suliassaqarfinnut tamakkiisumik tiguneqarsimasunut tunngassutillit.
Tamanna isumaqarpoq, Kalaallit Nunaat akuersissutaannarmik peqanngitsoq – inatsisitigulli tunngavilikkamik – politikkikkut akisussaaffinni tamani tigusimasatsinni nunanik allanik oqaloqateqarsinnaanissamut, isumaqatiginninniarsinnaanissamut suleqateqarsinnaanissamullu pisinnaatitaaffeqartoq.
Tamanna Kalaallit Nunaata politikkikkut ineriartornerani nammineq akisussaaffigisagut pillugit nunanik allanik oqaloqateqarsinnaanerput pissusissamisuuginnarpoq. Issittoq allanngoriartorpoq Kalaallillu Nunaat issittumi qitiulluinnarpoq, isiginnaaginnartussiaananilu.
Politiken naapertorlugu Naalakkersuisut Siulittaasuata amerikkarmiut saaffiginnissutaat itigartissimammagit Siumup tusaatissatut tiguaa. Tamassuma takutippaa, Kalaallit Nunaata nammineq nunanut allanut attaveqaatit isumatusaartumik akisussaassusilimmillu suliarisinnaagai. Tamannali aamma allatut ersersitsivoq: Nunat allat Kalaallit Nunaat oqaloqatigerusuppaat. Tamassumaannaap takutippaa Kalaallit Nunaata Issittumi nunallu tamalaat akornanni pissusissamisoortumik inissani tigujartuaaraa.
Naalagaaffeqatigiinneq ullumikkumut tulluuttoq iluatsiffeqarsinnaassappat Danmarkip Kalaallit Nunaata politikkikkut namminersuleriartornera annertusiartortoq ataqqisariaqarpaa. Kalaallit Nunaata nunanut allanut tunngassutilinnik suliaqarsinnaanera Danmarkimiit tunissutaanngilaq – inuiattulliuna pisinnaatitaaffipput. Tamanna Naalagaaffinngoriartornitsinni Siumup sulissutigisaani pingaarutillit ilagiinnarpaat.
Siumup Kalaallit Nunaata soqutigisai nunatsinnit ingerlanneqartuaannarnissaat sulissutigeqqissavaa. Qanga pissutsit qimakkiartuaakkagut tunngavilersuusiullugit aporfilersorniarneqarneq akuerinngilarput. Kalaallit Nunaat inuiaavugt nammineq siunissatsinnik ilusilersuisinnaatitaasut.
– Siumup Siulersuisuuneri