Nunaqarfinnut isorliunerusunullu angallassinerit piaarnerpaamik pitsanngorsartariaqavippoq.

Upernaviup eqqaani soorlu Kullorsuarmi piffissami sivitsortumi timmisartuussinermi ajornartorsiutit takutippaat Kalaallit Nunaata avannaani timmisartuussineq qanoq ilungersunartigisoq.

Qaammat juli ingerlanerani innuttaasut amerlasuut kinguaattoornernik aammalu angalanissamik unitsinneqarnerannik nalaataqarsimapput. Siullermik sila pissutigalugu, kingornali timmisartup teknikkikkut ajoquteqarnera pissutigalugu. Tamanna innuttaasunut annertuunik kingunerluuteqarpoq. Qaanaamut aammalu Tasiilamut angallannikkut ajorluinnartumik killiffeqarnerat ilanngullugu aamma aaqqinneqartariaqavipput.

Nakorsiartussat piffissaq eqqorlugu angalanissaat pinngitsoortarpoq aammalu ilaqutariit pilersaarutitik malillugit angalasinnaanngillat. Innuttaasut ilaat nunaqarfinni uninngasariaqarsimapput, ilaallu nammineq akilikkaminnik umiatsianik attartortariaqarsimallutik Upernavimmut apuunnissartik anguniarlugu. Aamma unnuiffissaaleqineq pissutigalugu innuttaasut ilaat ingerlaqqinnissaminnut periarfissaqartinneqartaratik. Taamatut pisoqartarnera akuersaarneqarsinnaanngilaq, aaqqinneqartariaqarlunilu.

Paasisinnaavarput sila pissutigalugu ajornartorsiuteqartartoq aammalu timmisartut ajoqusersinnaasartut. Taamaattorli tamanna tunngavigalugu sillimaniarnermut pilersaarutit pitsaanerusut pigineqartariaqarput, innuttaasut ullorpassuarni sapaatit akunnerinilu arlalinni periarfissaqaratik utaqqiinnartariaqanngimmata.

Taamaattumik Air Greenland aammaarluta piaartumk kaammattorumavarput sillimaniarnermut piareersimanini nukittorsaqqullugu, soorlu pisariaqartoqartillugu timmisartunik allanut attartornikkut imaluunniit angallassisunik allanik isumaqatigiissuteqarnikkut allatulluunniit.

Peqatigissanik Naalakkersuisut kaammattorumavagut piaartumik Air Greenland peqatigalugu Avannaani, Tunumi, Kujataani kiisalu nunaqarfinni isorliunerusunilu timmisartuussineq tamakkiisumik nalilersoqqullugu. Anguniarneqartariaqarpoq angallanneq patajaannerusoq, innuttaasullu nakorsiarniartut, ilinniarnissaminnut, sulinerminnut atatillugu ilaquttaminnullu angalanissaminnut aningaasarpassuit atorlugit akiliisimasut, periarfissaat ataasiinnarmik timmisartumik ajoquteqaqattaartartumik sillimmateqartinneqanngitsumillu atugaqartikkunnaarnissaat anguniaqullugu.

Angallanneq logistikkiinnaanngilaq. Nunatta isorliunerusortaani najugaqartunut tassaavoq inuuniarnermi pingaaruteqarluinnartoq.

Nunaqarfinni isorliunerusunilu innuttaasut Kalaallit Nunaata sinnerani innuttaasut assigalugit akileraartartuupput aamma toqqissisimanartumik tatiginartumillu angallanneqarnissamut pisinnaatitaaffeqarput. Tamanna inuiaqatigiittut ataatsimoorluta akisussaaffigaarput.

Neriuppugut Air Greenland aamma Naalakkersuisut piaarnerpaamik iliuuseqarlutik nunatsinni tamarmut, pingaartumik Avannaani, Tunumi, Kujataanilu kiisalu nunaqarfinni isorliunerusunilu, timmisartuussineq patajaannerulersillugulu tatiginarnerulersissagaat.