Nerisassanut tapiissut – sooq Kalaallit Nunaanni aamma atuutilersinnaanngila?

All.: Najaaraq Møller, Siumut tunuliaqutaralugu folketingimut qinigassanngortittoq

Danmarkimi innuttaasut aningaasakitsut naalagaaffimmit nerisassanut tapiissutinik tunineqartarput, taamaalillutik nerisassanut akissaqalertarlutik. Kisianni taamatut aaqqissuussineq nunatsinni innuttaasunut aningaasarliortunut atuutinngilaq.

Naalagaaffeqatigiinnermi innuttaasunut tamanut pisinnaatitaaffeqarnissamik periarfissaqarnissamillu assigiimmik tunngaveqartariaqarpoq – Danmarkimi, Kalaallit Nunaanni imaluunniit Savalimmiuni najugaqaraluaraanniluunniit.

Nerisassanut tapiissut Kalaallit Nunaanni aamma atuutilertariaqarpoq

Danmarkimi innuttaasut isertitakitsut naalagaaffimmit nerisassanut tapiissummik pisinnaapput, taamaalillutik akit qaffakkaangata nerisassanik pisisinnaajuaannarsinnaallutik. Tamanna Kalaallit Nunaanni periarfissaanngilaq.

Taanna nassuiaatissaqartinniarlugu ajornakusoortarpoq – pingaartumik nunatsinni nerisassat akii Danmarkimiit amerlanertigut qaffasinnerummata.

Ilai oqarsinnaassapput Kalaallit Nunaat nammineq aningaasaqarniarnini aqqutigalugu ajornartorsiutini nammineq aaqqinniartariaqarai. Aamma ilumoorpoq – inuiaqatigiittut nammineq akisussaaffeqarpugut.

Kisianni naalagaaffeqatigiinneq pillugu oqaluuserinnikkaangatta aamma ataatsimoorluta akisussaaffik pillugu oqaloqatigiissinnaasariaqarpugut.

Danmarkip ukiumut milliardilikkaanik nunanut assigiinngitsunut nunarsuarmiittunut ikiuutitut tapiissutigisarpai. Taamaattumik aamma eqqartorneqarsinnaasariaqarpoq qanoq Kalaallit Nunaanni innuttaasut Danmarkimi aaqqissuussinernit taamaattunit pisariaqartitsisoqartillugu periarfissinneqarsinnaanersut.

Uanga tamanna Kalaallit Nunaannit akisussaaffigineqartoq allanut nuutsinniarsarinngilara. Pineqartoq tassaavoq naalagaaffeqatigiinnerup iluani innuttaasut kalaallit nerisassat inuup pisariaqartitai pingaarnerpaat pillugit appasinnerusumik atugassaqartinneqannginnissaat.

Taamaattumik isumaqarpunga politikkikkut pingaarutilimmik oqaloqatigiissutigineqartariaqartoq nerisassanut tapiissutip taamaattup aamma Kalaallit Nunaanni innuttaasunut iluaqutaasinnaanera.

Naalagaaffeqatigiinnermi isumaqassappat inuit ulluinnarni inuuneranni malugineqarsinnaasariaqarpoq.