Nanortalimmi palasissaaleqinerup tunngaviisa pingaarnerit ilagaat ullutsinnut naleqquttumik peqqinnartumillu najugassaqartitsisoqanngimmat. Palasimmi illorsua pisoqarujussuuvoq, iluarsarneqartaraluarlunilu najoruminartunngortikkuminaalluni
All.: Anders Olsen, Inatsisartunut ilaasortaq
Piffissami sivitsortumi Nanortalimmi aalajangersimasumik palasissaaleqineq atuuppoq. Palasissaaleqinerinnaananili aamma ajoqissaaleqinerit pattattussaaleqinerillu atuuttartut pisut takutippaat. Tamanna ilungersunarpoq aaqqiivigineqartariaqavillunilu.
Nanortalimmi palasip illorsuatoqaa, ukiut ingerlanerinni iluarsartuunneqartaraluartoq, najugaqarfittut sullivittullu atussallugu ullumikkumut naleqqukkunnaarluinnarsimavoq. Tamannalu tunngavigalugu najugariutigalugu sullivigisinnaasaq pitsaasoq aningaasaliinikkut pilersinneqartariaqarpoq.
Palasissaaleqinerup soorunami nassatarai ulluinnarni innuttaasut ilagiinnit sullinneqarnerisa ajorseriarnerannik, naalagiartitsinerit annikillinerannik aammalu nunaqarfiit Nanortallip eqqaaniittut kiffartuunneqartarnerisa ajorseriaateqarnerannik tamarmik kinguneqarput.
Taamaammat palasissaaleqinerup anigorneqarnissaa piaartumik sulissutigineqartariaqartoq aammalu aningaasaliiffigineqartariaqartoq isumaqarpunga. Tamanna aningaasanut inatsisissap 2025-moortup suliarineqarnerani qulakkeerneqarsinnaasariaqarpoq.