Naalagaaffinngornissap aqqutaa silatusaarnikkut akisussaaffilimmillu tunngaveqarluni anguneqassaaq

All: Aka Hansen, siumut tunuliaqutaralugu folketingimut qinigassanngortittoq

Ukiuni makkunani namminiilivinnissarput pillugu oqallinneq initoorujussuuvoq. Amerlasuut
namminiilivinnissaq kissaatisaat oqaluttuarisaanitsinnut, kinaassusitsinnut
pisinnaatitaaffippullu atorlugu nammineq ilusilersornissaanut pisussaaffigigatsigu.

Uannut anguniagaq erseqqissuuvoq; Kalaallit Nunaat namminiilivittutut
naalagaaffinngussaaq. Tamanna Siumup pingaarutilittut isigalugu sivisuumik anguniagaraa.
Namminiilivinneq politikkikkut anguniagaanaanngilaq. Suliaq annertooq tassaavoq,
suliffeqarfinnik nukittuunik pisariaqartitsisoq, aningaasatigut patajaatsumik
qulakkeerinnittussaq. Inuiaqatigiittut eqqarsartaatsikkut aaqqissuusaanikkullu
allannguisussaq. Taamatut sulineq qangali aallartinneqareerpoq.

Uannut pingaaruteqarpoq
alloriarnerit arlallit ingerlaarfigeqqaassagigut; anguniakkatta tungaanut ingerlaarnitsinni
inuiaqatigiinnik nukittorsaasilluta.
Uanniit takorluukkap unitsinnissaanik tunnganngilluinnarpoq. Paarlattuanik takorluukkap
piviusunngortinnissaanut ilusilersornissaanullu anguniagaavoq.

Utoqqarpassuit naapittarnerani tusaavara inuunertik naannginnerani Kalaallit Nunaat
kiffaanngissuseqartoq takorusuppaat. Taakkua pillugit Folketingimi sulinissara aamma
pingaaruteqarpoq.

Uagulli inuusunnerusugut eqqumaffigilluinnarparput kinguaariinnut tulliuttunut
pitsaanerpaamik atugassaqartitsinissaq akisussaaffigigatsigu. Uanga kissaatiginngilara
meeqqama namminilivinnissaq sorsutigissagaat, soorlu uagut angajoqqaatta tamanna
anguniarsimagaat.

Taamaattumik isumaqarpunga oqaloqatigiinneq erseqqissoq pimoorussisorlu
ingerlanneqartariaqartoq Kalaallit Nunaanni qanoq namminilivinnissamut tunngavissat
pitsaasut anguniarlugu. Partiit ilaat Danmarkimut pituttuiniarnerullutik sulisut
isumaqatiginngeqaakka.

Illuatungaanilu aqagu namminiilivinnissaq pisariaqartitsinngilarput.
Siullertut pingaarnerpaavorli suliassaq taanna pingaaruteqaqisoq qulakkissallugu nammineq
nammassinnaagipput, taannalu anguniagaq Folketingimi aamma qulakkeerneqassaaq.
Namminiilivinneq assilissatut ilisarnaataanaanngilaq. Suliniutissaavoq inuiaqatigiinnik
toqqissisimanartunik, nukittuunik piujuartitsinermillu tunngaveqartunik kinguaariinnut
tulliuttunut qulakkeerinnittoq. Taanna anguniarlugu Folketingimi sulinera pingaarnertut
siunertaavoq.