Nalunaarusiaq piaartumik saqqummiunneqartariaqarpoq
Naartunaveersaasersuisimanermut suliaq pillugu inuit pisinnaatitaaffiinut tunngasut pillugit
nassuiaat piaartumik saqqummiunneqartariaqarpoq
Naartunaveersaasersuisimanermut suliaq pillugu 1960-ikkunnit ullumimut inuit pisinnaatitaaffiinut
tunngasut pillugit immikkut ilisimasalinnit misissuisimanerup nalunaarusiaa nutaamik
tiguneqartoq, Kalaallit Nunaata politikkikkut inuiaqatigiinnilu siunissaanut aalajangiisumik
pingaaruteqartuuvoq.
Naalakkersuisut nalunaarutigaat immikkut ilisimasalinnit misissuineq piffissap iluani
tiguneqarsimasoq, maannaillu tamanut saqqummiunneqannginnerani iluani suliarineqassasoq
kiisalu tuluttutit kalaallisut nutserneqassasoq. Paasissutissiissutigineqarpoq suliaq taanna sapaatit
akunnerinut arfinilinnut tungaanut sivisussuseqarsinnaasoq.
Maannakkut qinersisoqarnissaa nalunaarutigineqareersoq eqqarsaatigalugu
pingaaruteqarluinnarpoq nassuiaat sapinngisamik piaarnerpaamik saqqummiunneqarnissaa.
Misissuineq Naartunaveersaasersuisimanermut suliaq kiisalu 1960-ikkunnit kingorna
naartunaveersaartitsinermut tunngatillugu suleriaatsit pillugit nunarsuarmi tamani inuit
pisinnaatitaaffiisa aammalu nunap inoqqaavisa pisinnaatitaaffiisa pisinnaasinnaasunik
unioqqutitsivigineqarsimanerannik imaqartuuvoq. Tassunga ilanngullugu aamma nalilersuineq
ilaavoq, pisinnaasinnaasunik unioqqutitsinerit taamaattut inuiaqatigiit toqorarneqarnerannik
(folkedrab) taaneqarsinnaanersut pillugu.
Tamanna oqaluttuarisaanermut tunngatillugu apeqqutaanani kisiannili politikkikkut
inatsisilerinikkullu pingaarutilittut suliassaavoq, qinersinerup kingorna isumaqatigiinniarnernut
toqqaannartumik sunniuteqartussaq. Nalunaarusiap inerniliussai politikkikkut salliutitat,
piumasaqaatit, isumaqatigiinniarnerit aammalu nunat tamalaat akornanni iliuuserineqarsinnaasut
pillugit tunngavissiisinnaapput.
Taamaattumik pingaaruteqarpoq innuttaasut, qinersisartut aammalu partiiit politikkikkut suliallit
nassuiaatip imarisaanut sapinngisamik piaarnerpaamik periarfissaqarnissaat. Qinersisartut
pisinnaatitaaffeqarput apeqqummut inuit pisinnaatitaaffiinut, inatsisitigut isumannaatsuunermut
kiisalu Kalaallit Nunaata oqaluttuarisaaneranut siunissaanullu tunngatillugu ilisimasaqarnissamut.
Suliarinninnerup nutserinissallu piaartumik ingerlanneqarnerat qulakkiissavaa:
Qinersisartut paasissutissanik tunngavigalugit qinersisinnaanissaat
Partiiit nalunaarusiap inerniliussai qinersinermut atatillugu oqallinnermi
ilanngussinnaanissaat
Qinersinerup kingorna koalitionimik isumaqatigiinniarnerit paasissutissanik tamakkiisumik
tunngavigalugit ingerlanneqarsinnaanissaat
Ammasuunermik politikkikkullu akisussaassuseqarnermik ersarissumik
nalunaaruteqartoqarnissaa
Suliassaq tamanna innuttaasunut arlalinnut attorneqartunut kiisalu tamanut ammasumik
oqallinnermut annertoorujussuarmik pingaaruteqarsimavoq. Taamaammat piffissaliineq
ammasuunerlu aalajangiisuupput.
Taamaattumik nassuiaat salliutinneqarluni sapinngisamik piaarnerpaamik
saqqummiunneqartariaqarpoq.
Ineqi Kielsen