Ukiamut Inatsisartut 20. september ataatsimiillutik aallartissapput. Siumut inatsisissatut siunnersuuteqarpoq, nunatsinni nalunaaqutaq eqqortumik ingerlalissasoq, imaappoq UTC -3 uterfigineqassasoq. Ilutigisaanik aasakkut nalunaaquttap siuartinneqartarnera atorunnaassasoq siunnersuutigineqarpoq. Siunnersuut akuerineqassappat, ukiamut oktobarip 27-ani nal. 24:00 nalunaaqutaq akunnernik marlunnik kinguartinneqassaaq 22:00-mut, kingornalu nikiseqqinneqarani.
All.: Karl Tobiassen, Inatsisartuni gruppip siulittaasuat
Seqineq nuigaanngami nuisarpoq. Seqineq tarrikkaanngami tarrittarpoq. Siunnersuummi aalajangersarneqarpoq nalunaaquttamut malitassaq aammalu nalunaaquttap ingerlaqatigiiffia sorleq Kalaallit Nunaanni malinneqassanersoq. Siunnersuummi siunnersuutigineqarpoq nalunaaquttamut malitassaq tassaassasoq UTC, aammalu nalunaaquttamut nalinginnaasumut nalunaaquttap ingerlaqatigiiffia UTC -3 malinneqassasoq.
Kalaallit Nunaanni ullumikkut nalunaaquttap ingerlaqatigiiffia UTC -2 malinneqarpoq. Taamaalilluni siunnersuummi siunnersuutigineqarpoq Kalaallit Nunaanni nalunaaqutaq nalinginnaasoq nalunaaquttap akunneranik ataatsimik kinguartinneqassasoq. Imaappoq, nalunaaqutaq ullumikkut 14:00-inngorpat, siunnersuummi siunnersuutigineqarpoq tamatumunnga taarsiullugu nalunaaqutaq 13.00-inngussasoq, imaappoq seqerngup kaavinnera naapertorlugu nalunaaqutaq inissisimalissasoq, aamma aasakkut nalunaaqutaq nikisinneqartarunnaassasoq.
Siusinnerusukkut aasaanerani nalunaaquttap atorunnaarsinnissaanik suliniuteqarnissaq kissaatigineqarsimavoq, kingullermik 2019-imi upernaakkut ataatsimiinnermi immikkoortoq 55 ”Aasakkut nalunaaquttap atorunnaarsinnissaa suliniutigeqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut” aqqutigalugu. Siunnersuut akuerineqarpoq, kisianni suli piviusunngortinneqanngilaq. Inatsisartut aalajangiinerannut EU-mi aasaanerani nalunaaquttap atorunnaarsinneqarnissaata apeqqutaatinneqarnera tamatumani pissutaavoq. EU-mi aasaanerani nalunaaquttap nikisinneqartarnera suli atorunnaarsinneqarsimanngilaq.
Tusarniaassutigineqartoq uani atuaruk: https://ina.gl/gl/allagaatit/nutaarsiassat/uunga-siunnersuut-pillugu-tusarniaaneq-nalunaaquttap-aalajangersarneqarnera-pillugu-inatsisartut-inatsisaata-allanngortinneqarneranik-inatsisartut-inatsisaat/
Tusarniaaneq 5. august 2024, nal. 12:00 tungaanut ingerlanneqassaaq.