Naleraq oqaatsivut pillugit Inatsisartunut oqaluuserisassatut siunnersuuteqarsimanera Inatsisartut Siulittaasoqarfianit itigartitsissutigineqarsimammat, tamanna tusagassiorfitsigut aammalu socialmedia atorlugu salluliutigalugu Siumumut akisussaaffinngortinniarsaraa. Tamanna akuersaanngilluinnarakku erseqqissaassutigissavara.
All.: Erik Jensen, siulittaasoq
Oqaluuserisassatut siunnersuutit Inatsisartut Siulittaasoqarfianit isumagineqartarput, Siumullu tassani kisimi aalajangiisartuunngilaq. Inatsisartut Suleriaasiat partiinit tamanit (aamma Naleqqamit) akuerineqarsimasoq naapertorlugu Inatsisartut sulipput aamma sullinneqarput, tamannalu Siumup ataqqeqqissaarpaa. Naleqqallu tamanna ataqqiunnaarsimagaa aammalu suusupagisutullu ilersimasoq maluginiarpara. Siunnersuutinillu angummatsitsiniarneq siunnersuuteqartup nammineq akisussaaffigaa, taannalu akisussaaffik allanut miloriunniarneqarsinnaanngilaq.
Sallu oqaralugu oqalunneq
Naleqqap siulittaasuata avammut nalunaaruteqarnermini nammineq suliassarigaluaminut imminut errortorpoq. Ileqqoq taanna takornartaanngimmat oqaaseqarfiginerunagu pineqartoq qanoq Siumup tungaaniit inissisimanersoq nassuiassavara. Tikkuartuerusaarlunimi oqalorusaarneq qasunarsivoq, aamma suleqatigiinnissamut siuarsaataanngilluinnarpoq. Partiitulli kikkunnilluunniit suleqateqarusunnatik aaliangersimappata ajortussarsiornerinnarlu sulissutiginiarpassuk tamanna ataqqiinnassavara.
Suliap inissisimanera
Naleraq oqaatsivut pillugit siunnersuuteqarsimavoq. Aap, taannali Inatsisartut Siulittaasoqarfianit akuerineqarsimanngilaq. Paasisakka naapertorlugit Inatsisartut Siulittaasoqarfiat tunngavilersuisimavoq, Inatsisartut Siulittaasoqarfianni suliaq taanna ingerlareermat, itigartitsissutigineqartoq.
Taamak inissisimasoqarpalunnera Siumup ilisimaleramiuk Siulittaasoqarfimmut toqqaannaq allagaqarsimavunga, ujartorlugu suliaq Inatsisartut suleriaasiata nutarterneqarnissaanut tunngasoq, siorna partiinit tamanit (aamma Naleqqap siulittaasuata atsiorsimasaa) tunuliaqutserneqarluni allakkatigut apuunneqarsimasoq, sumut killinnersoq pillugit, aammalu piaarnerpaamik ingerlateqqullugu. Allakkanni erseqqissarpara Inatsisartut Suleriaasiat partiinit tamanit (aamma Naleqqamit) tunuliaqutserneqarsimasoq allanngortinneqassappat, tamanna suleriutsit naapertorlugit ingerlanneqartariaqartoq. Tassami Siumut partiitut akisussaassusilittut, inerisimasutut, tatiginassusilittut inatsisillu atuuttut tunngavigalugit ingerlatsinissamik pingaartitsisutut, malitassanik avaqqutaarisunngornavianngimmat.
Allagara suli Inatsisartoqarfimmiit akissuteqarfigineqanngilaq, taamaattoq erseqqissassavara, siunnersuummi siunertarineqartumut Siumut aporfilersuilernavianngimmat aamma akerliunngimmat. Suleriaaserli atuuttoq ataqqigakku oqaatigissavara.
Immaqa anguniakkamut qanillisaataasinnaagaluarpoq, asuli tikkuartugassarsiorneq namminerlu akisussaaffigisamik qimarratiginnikkunnaarluni, Inatsisartut suleriaasiata nutarterneqarnissaanik malitassavut naapertorlugit tamatta suleqataalerutta?
Oqaatsigut tunngavigalugit sulivugut
Naggataatigut erseqqissaatigissavara uagut Siumumi kalaallisut oqaatsigut pingaarnertut atorlugit tusagassiorfitsigut oqaaseqartaratta, apersorneqartaratta aammalu Inatsisartuni saqqummiussiissutit kalaallisut ingerlatarisaratsigit, oqaatsigut oqaasiinnaanngitsumik pingaartikkatsigit.
Siumup inunnik, partiinik ataasiakkaanik, Inatsisartoqarnermut nikassaanernik aammalu inuiaqatigiinni avissaartuutitsiniarnernik siunertaqarluni sulinerit ileqqorinngilai. Partiitut tatiginartutut, suleqatigineqarsinnaasutut, inerisimasutillu pissuseqarnissani pingaartitarimmagit. Parteerpulli sallu atorlugu inuiaqatigiinnut pajuttuutigineqarnera qisuariarfigisariaqalersimavoq, naak nalunngikkaluarlugu inuiaqatitta tamangajammik nalunngikkaat kikkut piviusumik eqqortumillu sulisarnersut.