Nakorsaqarneq niviarsiaqarnerlu pillugit annertuumik ernumavugut

Siumut Qeqertarsuarmiit qisuariarpugut, pissutigalugu inuiaqatigiinni peqqinnissamut sullissineq pillugu ilungersunarluinnartumik inissittoqarmat. Nalunngilarput sineriassutsinni pissutsit aamma ilungersunarsinnaasartut ilungersunartullu. Akuerinngikkutsigulu tamatta iliuuseqarluta nipitunerulertariaqarpugut. Kissaatigaarput Siumut Qeqertarsuarmiit nuna tamakkerlugu atsiortitsinermik aallartitsissasugut, inuiaat ajorluinnartumik pineqalernerat pinngitsoortinniarlugu, taamaaliornikkut inuttaasut tamaasa tunuliaqutigalugit nukittunerpaamik sunniuteqarniarluta.   

All.: Larseeraq Berthelsen, siulittaasoq, Siumut Qeqertarsuaq

Siumut Qeqertarsuarmiit qisuariarpugut, pissutigalugu inuiaqatigiinni peqqinnissamut sullissineq pillugu ilungersunarluinnartumik inissittoqarmat, tassalu sipaarniarneq pissutigalugu nakorsat pigaartutut mobilinik atuiunnaarnissaat pilersaarutigineqarmat.

Pilersaarutit pineqartut piviusunngortinneqassappata kingunerluutissat annerujussuusinnaapput, soorlu:

• Nakorsat tikeqqinnianngillat pigaartutut aningaasarsiat annaanerat pillugu.
• Niviarsiat tikeqqinnianngillat nakorsamik saaffigisassaqanngikkunik.
• Inuit inuunerannik kinguneqarsinnaasoq – angalaneq ukiukkut ajornakusoortoq peqqutigalugu napparsimasut angallattariaqarnerat ajorluinnartumik kinguneqarsinnaavoq.
• Napparsimaviup aningaasartuutai amerlanerulissapput nakorsiarniat angallattarnerannut, inissaqarnerannut nerisassaqarnerannullu aningaasartuutsit qaffarujussuassammata.

Taamatut sipaarniarneq akuerineqarsinnaanngilaq, ilutigalugu Qeqertarsuup inuisa inuunerannut peqqinnissaqarnerannullu ulorianartorsiortitsivoq. Ajorluinnartumik oqaatigineqarsinnaavoq: Naalagaaffiup immikkoortortaqarfiata innuttaasunut sumiginnaanermik oqaatigineqarsinnaasumik iliuuseqarneratut isikkoqarluni.

Qeqertarsuup innuttaasui pillugit peqqinnissaqarneq illersorneqartariaqarpoq. Nalunngilarput sineriassutsinni pissutsit aamma ilungersunarsinnaasartut ilungersunartullu. Akuerinngikkutsigulu tamatta iliuuseqarluta nipitunerulertariaqarpugut.

Pissutsit suli ajorsiartorput. Nunalu tamakkerlugu politikikkut sulisussatut qinikkat iliuuseqaqataallutik aallartittariaqarput.

Kissaatigaarput Siumut Qeqertarsuarmiit nuna tamakkerlugu atsiortitsinermik aallartissasugut, inuiaat ajorluinnartumik pineqalernerat pinngitsoortinniarlugu, taamaaliornikkut inuttaasut tamaasa tunuliaqutigalugit nukittunerpaamik sunniuteqarniarluta.   

Taamaattumik Naalakkersuisunut apererusuppugut: Qanoq tigussaasunik iliuuseqarniarpisi, nunatsinni peqqinnissaqarfik toqqissisimanartoq pilersinniarlugu?