Naammaleqaaq! Aqutsinerlunneq atuartut siunissaannik akeqartinneqalerpoq
Kommuneqarfik Sermersuummi Siumup gruppiata piumasaraa, Nuummi atuarfinnik matusinerit kinguartoornerillu pillugit ammasumik erseqqissumillu paasissutissiisoqassasoq. Angajoqqaat qinikkallu ersarissunik akissutissarsinissartik pisariaqartilluinnarpaat.
All.: Dorthe-Marie Mogensen-Fontain, Sermersuummi Siumup gruppiata siulittaasuat
Siumut gruppianiit atuarfiit pillugit suliat erseqqissumik aammalu innuttaasunut pitsaasumik paasissutissiinissaq maanna sakkortuumik piumasaraarput.
Atuarfik nutaarsuaq ammarsinnaanngitsoq, atuarfik ataaseq matusoq. Pissutsit ilungersunarluinnarsipput aqutsinerlunnerup aqqani. Atuarfik Inussuup suliarineqarnerani Siumumiit piumasaraarput paasissutissanik ersarissunik kommunalbestyrelse saqqummiuffigineqartariaqartoq. Tusagassiuutitigut suut tamaasa ingerlanneqarsinnaanngillat, pissutsillu qanoq ingerlariaqqiffigineqarnissaat kommunalbestyrelsimi ilaasortaasut nassuiaaffigineqartariaqarput.
Angajoqqaarpassuit ulluni tulliuttuni ernumassutaat paasilluinnarsinnaallugit oqaatigerusupparput. Siumut gruppianiit sakkortuumik isornartorsiorparput atuarfik nutaarsuaq sanaartorneqarnermigut naammassineqarnermigullu atuutilersinnaannginnera akisussaassuseqanngitsumik ingerlasimanerup ersersimmagu.
Atuartut qanoq pineqassappat? Naammassisussat soraarummeertussat qanoq pitsaasumik ingerlanneqassappat? Ulluinnaat atuartumut qanoq sunniuteqartigisinnaappat? Suut piareersimaffigineqarpat? Apeqquterpassuarnik angajoqqaat assigalugit peqarpuguttaaq, ingerlatsineq ammasumik ingerlanneqanngimmat qinikkat akornanni aammalu ataatsimiisitaliat iluminni, angajoqqaallu pitsaasumik ernumassuteqartut paasitinneqartariaqarmata.
Atuarfik Ukaliusaq maanna matuneqarpoq, tamannalu qanoq sunniuteqassanersoq aammalu atuartut siunissaannik kalluaasussaammat qinikkat immikkut ittumik aggersarneqartariaqarput paasissutissanik avitseqatigineqarlutik. Nalunnginneqarpormi atuarfiit pisoqalisut marluusut taamaattumillu Atuarfik Inussuk pilersinneqarniartoq, siunissarlu eqqarsaatigalugu atuarfiit tamarmik matuneqarpatami?
Siumumiit tikkuukkusupparput piaartumik qinikkat aggersarneqarnissaat.