Namminersorneq pillugu Inatsit qanoq allanngortinneqarsinnaanersoq pillugu Naalakkersuisut Siulittaasuata aamma danskit ministeriunerata oqaloqatigiissimanerat isumakulunnarpoq. Inatsit inuiaat Kalaallit pigaat taamaammallu nunani allani naalakkersuisut akuutillugit isumaqatiginninniutissaanngilaq, pingaartumik piginnaatitsissummik tigummisaqanngikkaanni. Naalakkersuisut Siulittaasuat Inatsisartuniit innuttaasuniillu pisinnaatitsissuteqanngilaq.
All.: Jess Svane, Siumumi ilaasortaq
Naalakkersuisut Siulittaasuata danskillu ministeriunerata piffissami kingullermi Namminersorneq pillugu Inatsimmut tunngasutigut avammut nalunaarutigisartagaat ernumanartoqartoq isumaqarpunga. Namminersorneq pillugu Inatsit nunat marluk akornanni isumaqatiginninniutissaanngilaq. Inatsit tassaavoq inuiaat Kalaallit piumasaanik ersersitsisoq taamaallaallu inuiaqatigiit Kalaallit pigisaat allanngortissinnaasaallu.
Pisariaqalersimagunarpoq aammaarluni naqissusissallugu, Namminersorluni Oqartussaaneq aamma inuiaat Kalaallit namminiussuseqarnissamut pisinnaatitaaffiat akitsorterussissutaasinnaanngimmat, nuna sorlerluunniit pineqaraluarpat.
Piginnaatitsissuteqartoqanngilaq
Taamaammat akunnattoornarpoq, Namminersorneq pillugu Inatsit qanoq allanngortinneqarnissaa pillugu Naalakkersuisut Siulittaasuat Danmarkimut oqaloqatiginnilluni aallartissimammat. Tamannami pivoq oqartussaaqataanermik tunngaveqarani, Inatsisartunut tunuliaqutserneqarsimanani aamma innuttaasut ilisimanngisaanik.
Qularutiginngilara Siumup aalajangiusimassagaa, Namminersorneq pillugu Inatsit sutigulluunniit allanngortinneqassappat, tamanna aatsaat pisinnaasoq innuttaasut peqataatillugit tunuliaqutsiisimatillugillu. Tassami inatsit taamak pingaaruteqartigisoq matut matoqqasut tunuanni allanut isumaqatiginniniutigineqarsinnaanngivippoq, aamma apeqqummi oqartussaaqataaneq ataqqinagu ingerlaniartoqalersinnaanngilaq.
Nunanit allanit, aamma Danmarkimit aningaasaliinerit tikiulluaqquagut, aamma inuussutissarsiutivut ineriartussappata tamanna avaqqussinnaanngikkipput nalunngilarput. Tamannali uagut maani najugaqartut aqussinnaasatsinnik pisariaqarpoq.
Maluginiarnarpoq Danmarkimit siornatigut attorumaneqanngivissimasut maana imaaliallaannagassanngorsimasutut nipeqalersimammata. Soorlu nunatsinnut aningaasaliissuteqarnerunissamik oqalulersimaneq eqqarsaatigalugu. Tukkusorujussuanngorneq nunarsuarmi pissutsinut tunngassuteqartoq tamatta ilisimagunarparput.
Nassuiaasariaqarpoq
Isumaqarpunga pissusissamisuussasoq Naalakkersuisut Siulittaasuat periarfissaq siulleq atorlugu, sulerisimanini qanorlu danskit peqatigalugit siunnerfilersuisimarpalunnini pillugit, Inatsisartunut nassuiaaterpat. Kalaallit Nunaata siunissaa namminiussuseqarneralu pillugit oqalunneq isumaqatiginninniarpalunnerlu taamaallaat ammasumik ingerlanneqarsinnaapput, aamma taamaallaat innuttaasut erseqqissumik tunuliaqutsiisimaneratigut.
Nassuiarneqartariaqarpoq Danmarkimut atanerup nukittorsarneqarnissaanik oqariartorneq kikkunnik tunuliaqutaqarluni oqariartornerunersoq. Aamma partii uanga ilaasortaaffigisara oqariartornermut tassunga tunuliaqutsiisunut ilaanersoq paaserusunnarpoq. Tunuliaqutaasimaguttalu Naalakkersuisooqataanermi ilaanerput apeqqusertariaqartoq isumaqarpunga.