Naalagaaffeqatigiinnerup iluani realkreditimik taarsigassarsisinnaanermut periarfissani assigiinngisitsineq unitsinneqartariaqarpoq.

All: Doris J. Jensen, aaqqissuussaanikkut siulittaasup tullia, aamma folketingimut qinigassanngortittoq

Ullumikkut nunatsinni innuttaasut amerlasuut pingaartumik nunaqarfinni isorliunerusunilu Danmarkimi innuttaasunut sanilliullugit realkreditimik taarsigassarsisinnaanermut periarfissatigut ajornerusumik inissisimapput. Tamanna isumaqarpoq illuliorsinnaaneq, inissialiornissamut aningaasaliisinnaaneq imaluunniit najukkani ineriartortitsinissaq periarfissakinnerujussuusoq.

Tamanna naapertuutinngilaq. Pingaartumik nunatsinni nunap immikkoortuini arlalinni ass. avannaani nunaqarfinni aningaasarsiornikkut tunngavissaqarluartoqarmat kisianni realkreditsimut qinnuteqaraangamik aporfissanik annertuunik naapitaqartarput.

Naalagaaffeqatigiinnermi innuttaasut tamarmik assigiimmik periarfissaqartariaqarput Kalaallit Nunaanni imaluunniit Danmarkimi najugaqarneq apeqqutaatinnagu, aamma illoqarfinni angisuuni imaluunniit nunaqarfinni najugaqarneq apeqqutaatinnagu.

Folketingimut qinigassanngortittutut sulissutigissavara realkreditimik taarsigassarsisinnaaneq aammalu inissianik aningaasalersuinissamut periarfissat naapertuunnerulernissaat. Innuttaasut periarfissaat assigiinngisitaartariaqanngillat naalagaaffeqatigiinnerup iluani sumi najugaqarnerat tunngavigalugu.