Inatsisartunut ilaasortaq Erik Jensen, Siumut
Inatsisartut suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut:
- Nuummi mittarfissap ukiumik ataatsimik kinguaattoornera Kangerlussuarmi mittarfiup iluarsartuunneqarnissaanut qanoq kinguneqassava?
- Kangerlussuarmi mittarfiup iluarsaanneqarnissaata kingusinnerusukkut aatsaat allartinneqassappat kinguarsarneqassappalluunniit akisunerulernerneranik kinguneqassava?
- Kangerlussuarmi unnuisarfiup (hotel) namminersortunngorsarneqarnissaa Naalakkersuisut qanoq isumaqarfigaat?
- Unnuisarfiup (hotel) namminersortuniit ingerlanneqarnissaa soqutigineqarpat, mittarfeqarfinniit namminersortunut qaqugumiit tunniunneqarsinnaasoq Naalakkersuisut takorloorpaat?
- Sakkutuunngorniarluni ilinniarfissamut Naalagaaffiup aningaasat immikkoortissimasai kr. 50 mio. Naalakkersuisut sooruna qujarutinngikkaat?
- Sakkutuunngorniarnissamut taarsiullugu upalungaarsimanermut ilinniarfissamut atatillugu, Naalakkersuisiniit Naalagaaffimmut oqaloqatiginninnerit qaqugu aallartissappat?
- Nunatsinni takornariaqarnikkut annertusaanissamut Kangerlussuarmi aammalu Sisimiut Kangerlussuullu akornganni aqqusineqalerneratigut periarfissatut neqeroorutigineqarsinnaasut Naalakkersuisut pitsaasutut aningaasarsiornikkullu tapertaalluarsinnaasutut isumaqarfigivaat?
- Kangerlussuarmi mittarfiup Kalaallit airport internationalimut ilanngutsinneqarsinnaanera Naalakkersuisut qanoq isumaqarfigaat?
Tunngavilersuut:
Inatsisartut suleriaasiat §37 atorlugu apeqquteqaatinni Naalakkersuisut akissutaat: 2021 -062 aamma 2021-98 aallaavigalugit maanna apeqquteqaqqinnissannut pissusissaqarlersippaannga.
Maanna saqqummiunneqarsimalerpoq Nuummi Ilulissanilu mittarfiit ammanneqarnissaat ukiumik ataatsimik kinguaattoortoq. Taamatumap kingunerisaanik suliniutinut ingerlasunut sunniuteqassanersoq paaserusunnarpoq. Aammalu ilisimaneqartutuut Kangerlussuarmi mittarfissuaq 2.815 meter-iusup (Nuummi Ilulissanilu mittarfiulersussaniit suli takinerungaartup) sooq KAIR-ip iluani inissisimassannginnersoq apeqqutigerusunnarluni.
Kissaatigaara apeqquteqaatikka ullut suliffiusut qulit qaangiutinnagit akineqassasut.