Ilaqutariinnut meeqqiortunut atugassarititaasut pitsaanerulertariaqarput, meeqqanik paaqqinnittarfinni nuna tamakkerlugu akigitinneqartut assigiissartariaqarput appasinnerpaaffissaat anguniarlugu.
All.: Peter Davidsen
Nunatsinni innuttaasut ikiligaluttuinnarpugut, meeqqat inunngortartut ikiliartorput aamma avammut nuuttartut amerliartorput.
Ilaqutariit meeqqiortut tassaanerusarput inuusuttut ilaqutariittut aallartisartut, soorlu ilinniagaqareernerup kingorna, suliffeqalersimanerup kingorna il.il.
Taakkulu meeqqiornermi saniatigut meeqqerivinnut akiliutigisartagaat, nioqqutissat, meeqqat atisai, ineqarnermut, allallu ilaqutariittut aallartisarnermi aningaasartuutaasartut unammillernartut annertoqaat meeqqiornerunissamullu artukkiisarlutik.
Taamaammat inuiaqatigiit ikiliartuinnassanngikkutta ilaqutariinnut meeqqiortunut atugassarititaasut pitsaanerusariaqarput aamma nuna tamakkerlugu pilersaarusiortariaqarpugut iliuuseqarlutalu taakku ulluinnarni atugaasigut oqilisaaffigissallugit.
Nunatsinni meeqqat paaqqinnittarfiinut akigitinneqartut nuna tamakkerlugu qulaajarneqartariaqarput nalilersorniarlugu akigitinneqartut qanoq assigiinngitsiginersut, minnerunngitsumillu nalilersorniarlugu meeqqanut paaqqinnittarfinnut akigitinneqartut nuna tamakkerlugu assigiilersinneqassappata qanoq tamakkiisumik kinguneqassanersoq/naleqassanersoq.
Tamatuma saniatigut nalilersorneqartariaqarpoq meeqqat paaqqinnittarfiannut akigitinneqartoq annertunerpaaffilerneqassappat qanoq kinguneqassanersoq/naleqassanersoq.