All.: Dorthe-Marie Mogensen-Fontain, Kommuneqarfik Sermersuummi kommunalbestyrelsimi Siumut sinnerlugu ilaasortaq
Kommuneqarfik sermersuumi meeqqanut atuarfeqarnermullu ataatsimiisitaliaq paasisassarsiorluni angalavoq oktoberip 8-16 ilanngullugu.
Angalaneq aallartippoq qallunaat nunaanni tassanilu paasisassarsiorfigineqartut tassaallutik e-sport aammalu immikkut pisariaqartitsisunut klassiliornerni misilittagaqarfigisimasaat.
Islandimi paasisassarsiornermi peqqinnarnerusumik inuuneqarneq annertuumik sammineqarpoq. Taassumalu taputaralugu pinaveersaartitsineq imigassanut aanngajaarniutinillu.
Qineqqusaarnitsinnilu uani anguniagassatut siunniunnikuuarput Islandimi periuserineqartoq kommuneqarfik sermersuumi atuutilerneqarnissaa. Uanilu qinigaaffimmi anguneqassaaq meerartagut pillugit! Aningaasat atorneqartut ukiumut 302 millionit kr missiliulerpaat! Allannguisariaqalerpugullu!
Meerartagut pitsaanerusumik siunissaannik ilusilersueqataaniarutta qinikkatut sinaakkutinik pitsaasunik aallartittariaqarpugut. Oqaannarata meerartagut siunissaraagut iliuuseqarniaritsi! Meerartattami nammineerlutittaaq akisussaaffiginngilaat siunissarigatsigit inuunertik ilusilersussallugu inersimasortatta ilimasuutaat malillugit. Inersimasut akisussaasuupput meerartatta siunissaannut ilusilersuissallutik iliuuseqassallutillu pitsaasumik ineriartortitsineq tunaartaralugu.
Aallarnerfigisariaqagarput tassaavoq oqartariaqaratta tamatta meerartagut illersorumavagut.
Tamannalu assiginngitsorpassuartigut maanna iliuusissatut pilersaarutaareerpoq. Soorlu ernumassuteqaruit meeqqanut saaffiginnissinnaavutit inunnut isumaginnittoqarfimmut….
Uanili toqqammaviusumik aalajangiisariaqalerpugut angajoqqaat peqatigalugit;
Oqarluta: meerartagut illersorniarlugit aalajangerpugut!
Atuartoqartillugu tassa oqarutta 1. septembarimiit 1. maj tungaanut
- Meeqqat 6 – 12 ukiullit unnukkut arfineq-pingasunut angerlareersimassapput.
- Meeqqat 13-16 ukiullit unnukkut qulinut angerlareersimassapput.
Aasaaneranili allannguuteqartillugit
- Meeqqat 6-12 ukiullit unnukkut qulinut angerlareersimanissaat.
- Meeqqat 13-16 ukiullit unnuap-qeqqa angerlareersimanissaat.
Uani angajoqqaat peqatigilluinnarlugit taamatut ilusiliisoqarsinnaavoq, killigitinneqartullu avataanni angajoqqaamik, inersimasumilluunniit ilagisaqarlutik soorunami anisinnaallutik.
Taamatut oqaariartuuteqarnitsigut annerpaaq tunngavigaarput, tassa meeraq kinaluunniit illersugaassammat. Angajoqqaaminit, nunaqqatiminit, aammalu qinikkanit illersorneqassammat. Uanilu iluaqutissartaasa ilagilluinnarpaat meeqqat unnukkut eqqissillutik angerlarsimaffimmi ilinniakkerinissaminnut, innarnissaminnut, ullormullu pisunut angajoqqaaminnut periarfissaqassammata oqaloqatigiinnissaannut.
Ataatsimoorluta meerartatta siunissaat allanngueqataaffigisigu.
Islandimilu periuserineqartoq imaqangaarneroqaaq tamanna aamma politikikkut anguniakkatsinni suli annertunerujussuarmik aallutissavarput. Pinaveersaartitsinerinnaq uani atornagu susassaqartut kikkulluunniit ikioqatigiilluta kivittariaqalerparput meerartatta peqqinnarnerusumik inuuneqalernissaannut iliuuseqarluta.
Pingaartutullu isigisariaqartut ilagaat eqqarsartaatsikkut peqqissusitta aallunneqarnissaa.
Imigassamik aanngajaarniutinullu atuinitta allannguuteqarfiginissaa.
Imigassamik aanngajaarniutinullu timitsinnut sunniutai aallaavigalugit peqqinnarnerusumik inooriaaseqalernissamut aqqutissiuussinissaq.
Sanngiinnerusortatta ikorfartorneqarnissaat.
Atuarfeqarfinni peqqinneq sinaakkusersorluarnissaa.
Anguniakkavut aallukkusullugit oqallissaarummik aallartitsivugut.
Oqallilluarisi.