All.: Lars Poulsen
Kultorerput innarlerneqalerpoq – Inooriaaserput nerisaqariaaserpullu innarlerneqalerput – Ukiussamut pilisarneq neqissaqarniarneq innarlerneqalerput!
Upernaaq nunatta kangianeersugut nuannaarutigeqisatsinnik Inatsisartunut ilaasortat Naalakkersuisooqatigiinneersut ilaat qilalugartassat ukioq mannamoortut ilaneqarnissaannik oqariartuuteqarnera tigulluarparput. Piniarnermut naalakkersuisulli neriunneq tamanna allanngortilluinnarpaa.
Piniarnermut naalakkersuisup Inuit Ataqatigiinneersup uannut akissutaani ilaatigut erserpoq nunatta kangiani qilalugartassanik ilasisoqarnani ikilisaasoqarnissaanik Naalakkersuisut pilersaaruteqartut. Tamanna nunatta kangiuneersuusugut ernumassutigaarput. Ulluinnarnimi inuuniarnitsinnut qilalugaq qernertaq pingaaruteqartorujussuuvoq, minnerunngitsumillu kultooritta qangarsuaaniilli attassimasatta piuinnartinnissaanik ulorianartorsiortitsilluni.
Maanna Naalakkersuisooqatigiilersut partiivisa qineqqusaarnerminni siuttunngortunik qilalugartassat ingerlatiinnartumik amerlineqarnissaanik neriorsuisaqattaarput, ilaatigut imaasiallaanarluni qilalugartassiisoqarsinnaasoq qineqqusaarutiginikuuaat. Naalakkersuisooqatigiit inatsisartuutitaat upperissavarput? Imalt. Naalakkersuisut? Nunatta kangianeersuusugut toqqissisimassagutta Naalakkersuisooqatigiit ataatsimik oqariartuuteqartariaqarput. Qineqqusaarnermi qineqqusaarutit asuli neriorsuutaannaappat?
Siumumiit isumaqarpugut nunatta kangiani qilalugartassat ikilineqanngilluinnartariaqartut, illua tungaanili amerliartortinneqartariaqartut. Taamaattumik Piniarnermut naalakkersuisoq kaammattorparput piaartumik nunatta kangiani piniartut peqatigalugit qilalukkanik kisitseqqissaarnerit ingerlanneqarnissaannik pilersaarusiortariaqartoq. Taassumalu tungaanut Politikkikkut aalajangiisoqartariaqartoq pisassat ikilineqannginnissaanik.
Siumumiit piumasaraarput qilalukkanut qernertanut pisassiissutit nunatta kangianoortut aappaagortinnalu ikilinnginnissaannik naalakkersuisut aalajangiisariaqartut, tamannalu piaartumik avammut nalunaarutigineqartariaqartoq.
Naalakkersuisunik suleqateqarnissarput qilanaaraarput, Naalakkersuisullu pisariaqartitsigunik saaffiginnissinnaanissaannut Siumumi ammavugut.