Kuannersuaq pillugu Siumup iluani oqaluuserisassaqanngilagut, pingaartumik sumiiffimmi innuttaasut suna kissaatiginerlugu erseqqissumik oqariartuuteqarsimatinnagit. Kingullermik Siumut ataatsimeersuarmat apeqqut taamak paasillugu matuneqarpoq.
All.: Vivian Motzfeldt, siulittaasup tullia
Tamanna pissutigalugu uggornarpoq Siumut sinnerlugu qineqqusaartoq, Jess G. Berthelsen, partiip ataatsimeersuarnermi aalajangersagai avaqqullugit oqariartuuteqarmat. Tamanna pisariaqanngitsumik tunngavissaqanngitsumillu Kujallermi, pingaartumik Narsami najugaqartunut, toqqissisimatitsinngilaq aamma Siumup qanoq aalajangersaasimaneranik nalornilersitsivoq.
Erseqqissartariaqarpoq Kuannersuarmut tunngatillugu apeqqut kingullermik ataatsimeersuarnermi matuneqarmat. Sumiiffimmi najugallit, pingaartumik aatsitassarsiorfiusussamut qanillutik najugallit, aalajangiisuussussaapput. Maanna Siumumi aqutsisut pilersaaruteqanngillat apeqqut qaqeqqissallugu. Taamaattumik Kuannersuaq aatsitassarsiorfiulissanersoq Siumup partiitut Inatsisartunut siunnersuutiginavianngilaa, aamma Naalakkersuisuutitaqaqqilissagutta apeqqut suliassanut ilaanavianngilaq.