Piffissami sivitsortumi Kommuneqarfik Sermersuumi ineqarneq pillugu suliaq assigiinngitsuniit isornartorsiorneqartarpoq, kammeradvokatimiit, nakkutilliisoqarfimmiit, ingerlatsinermik misissuinermiit, il.il. taakkulu saniatigut aamma pissutit allat kommunip aningaasanik aqutsineranut attuumassutillit apeqqusernartumik tusagassiorfinniit sammineqarput.
All.: Peter Davidsen, Sermersuummi Siumut gruppia sinnerlugu.
Kommuneqarfik Sermersup kommunimi pisortaq Danmarkimi isimigut suliaritinneranut akiligassaq 22.000 koruuniusoq kommunip akilersimavaa.
Qulaani taaneqartut tunngavigalugit Nakkutilliisoqarfiup aalajangerneri innersuussinerilu nunatsinni Kommunit aqunneqarnerat pillugu Inatsisartut inatsisaat nr. 29, 17. november 2017-imeersoq aallaaveqarmata paaserusunnarpoq tamanna Naalakkersuisut qanoq iliuuseqarfiginiarneraat?
Nakkutilliisoqarfiup aalajangiinera ulloq 9. november 2021-meersuuvoq. Kommuneqarfik Sermersuup inissianik pilersuinermut ilusiliinera pillugu nakkutilliinermi immikkoortunik 14-inik ilaatigut ima inerniliivoq innersuussuteqarlunilu.
6: Aningaasaqarnermut Ataatsimiititaliamut suliami paasissutissiinerup naammattumik tamakkiisuunissaa, Kommuneqarfik Sermersuumi borgmesterip nakkutigisimanngimmagu, takuuk kommunit aqunneqarnerat pillugu Inatsisartut inatsisaanni § 19, Nakkutilliisoqarfiup annertuumik isornartoqartippaa.
Nakkutilliisoqarfiup innersuussutai Naalakkersuisunut:
10: Suliassani ilaatinneqartuni ineqarnermut tapersiinermut taarsigassarsiat akuerineqartut inatsisinut naapertuuttumik akuerineqarsimanersut Ineqarnermut, Attaveqaasersuutinut, Naligiissitaanermullu Naalakkersuisoqarfiup suliassaqarfimmut oqartussatut naliliissasoq, Nakkutilliisoqarfiup inassutigaa.
13: Aningaasaqarnermik aqutsinermut atatillugu missingersuusiornermut naatsorsuutinullu inatsimmi aalajangersakkat, ilanngullugu akiitsorsimasinnaaneq, malinneqarsimanerannut tunngatillugu Aningaasaqarnermut Nunamullu Namminermut Naalakkersuisoqarfiup nakkutilliinermut suliassaq aallartissagaa, Nakkutilliisoqarfiup inassutigaa.
Naluneqanngitsutut Kommuneqarfik Sermersuumi Siumut gruppiani siulittaasup Aningaasaqarnermut Inuussutissalerinermullu Ataatsimiitsitaliami piumasaraa Ineqarnermut immikkoortumik ingerlatsinermik kukkunersiuineq (inissiat pillugit) aammalu A/S-nut isumaqatigiissutit ilanngullugit misissuiffigineqarnissaat ernumanartoqarmat. Ingerlatsinermut kukkunersiuinerup/misissuinerup kinguneraa allaat ingerlatsinermut ilisimatooq ima naliliisariaqalerluni, Professori ingerlatsisimanermik misissuisimaneq pillugu: – Atuarsimasanni ajornerpaavoq. https://sermitsiaq.ag/kl/professori-ingerlatsisimanermik-misissuisimaneq-pilluguatuarsimasanni-ajornerpaavoq.
Taamaattumik Kommuneqarfik Sermersuumi Siumut gruppianiit kissaatigaarput Nakkutilliisoqarfiup Naalakkersuisunut innersuussutai akisussaasuniit iliuuseqarfigineqassasut, sulimi ulloq manna tikillugu innersuussutigineqarsimasunut Naalakkersuisuniit pisortatigoortumik qisuariaatinik takusaqannginnatta, kissaatigissavarput Naalakkersuisut Kommunit aqunneqarnerat pillugu Inatsisartut inatsisaat nr. 29, 17. november 2017-imeersoq tunngavigalugu iliuuseqassasut, nunatsinni Inatsisartut inatsisaat atuuttut malinneqassappata akisussaasut iliuuseqartariaqarmata.