Kommune Qeqertalimmi kommunalbestyrelsimi missingersuutit pillugit aappassaaneerinninnermi Siumut peqataavoq akuerseqataallunilu
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Kommune Qeqertalimmi kommunalbestyrelse missingersuutit 2022-moortut aappassaaneerneqarput ulloq 30. november 2021.
Missingersuutit pillugit aappassaaneerinninnermi ulloq 30. november 2021-mi kommunalbestyrelsimi partiit tamarmiullutik akuersineranni Siumut peqataavoq.
Missingersuutit kommunalbestyrelsimi siullermeerlugit suliarineranni ulloq 30. september 2021 aallaqqaammut akuerseqataasimanngilagut. Siullermeerinninnermi nunaqarfinni ineriartortitsinissamut sanaartugassatigullu suliniutit ersarlussimanerat tunngavilersuutigalugu akuerseqataasimanngilagut.
- Missingersuutit pillugit isumaqatigiinniarnerit ingerlaneranni Qasigiannguani ilaqutariinnut inissialiortoqarnissaanut aningaasaliinissaq ujartorlugu qulakkeerusussimavarput.
- Attumi atuarfik ullumikkut pitsaanngitsumik inissisimasoq oqoqarsinnaaneranillu ilimanaateqarsinnaasoq iliuuseqarfigineqarnissaanut aningaasaliisoqassasoq piumasarisimavarput.
- Ikamiuni meeqqeriviup ukiuni aggersuni piviusunngortinnissaa qulakkeerniarlugu aningaasaliisoqarnissaa piumasarisimavarput.
- Kangaatsiami aqqusernit pitsanngorsartariaqartut ukiumi 2022-mi missingersuutinut aningaasaliisoqassasoq pingaartissimavarput.
- Kangaatsiami ivigaasaaqqanik arsaaffittaarnissamut pilersaarutip aningaasaliiffigineqarnissaa kissaatigisimavarput, saniatigullu siunissaq isigalugu Kommune Qeqertalimmi nunaqarfinni ivigaasaaqqanik arsaaffiliortoqarnissaanut suliniutit aallartisarneqassasut naaperiaassutigisimallutigu. Maannakkut Attumi ivigaasaaqqanik arsaaffittaarniaqatigiit aallarnisarneqarnerat ilutigalugu ivigaasaaqqanik arsaaffittaarnissamut suliniutit aningaasaliiffigineqarnissaat pissusissamisoorpoq.
- Kommunip akigititai (taksblad) tamarmik minnerpaamik 5 % tikillugu qaffanneqartussatut siunnersuutigineqarsimagaluartut, meeqqeriviit akii ilanngullugit qaffannertussaagaluartut, missingersuutit pillugit aappassaaneerinninnermi qaffaanissap pinngitsoortinnissaanut naaperiaasimanerput partiinit tamanit tigulluarneqarnera nuannaarutigeqaarput. Taamaalillutik kommunip akigititai tamarmik minnerpaamik 5% tikillugu qaffanneqartussaagaluartut, meeqqeriviillu akii qaffattussaagaluartut pinngitsoortinneqarput.
Taamaalilluta missingersuutit aappassaaneerneqarneranni naaperiaassutigut, anguniakkagut pingaartitagullu ilanngunneqarmata Siumut akuerseqataassalluni pissutissaqalerpoq.