KNI Pilersuisoq suli anginerulertariaqarpoq
KGH-ip namminersortunngorsarneqarsimanera iluatsinneqarsimanngittoq nassuerutigisariaqarpoq. Illoqarfinni mikinerusuni aammalumi nunaqarfippassuarni niuertarfeqarnikkut pissutsit ajorseriarsimanerat sivisuallaamik iliuuseqarfigineqarsimanngimmat ajuusaarnarpoq. Akerlianik maanna annerusumik iluanaartuupput Norskit Pisiffimmik piginnittuusut.
Illoqarfinni annerusuni pingasuni aammalu illoqarfinni mikinerusuni Pisiffeqartuni jyskeqartunilu nioqqutissat qiniataarneqarsinnaasut (nerisassaanngittut) assigiinngippallaarput, illoqarfinni mikinerusuni toqqagassat ikippallaarput tamannalu pisisartunut assigiinngisitsineq akueriuminaappoq. Assersuutissaqqippoq maani Aasianni jyskimi nerriviit sofa-llu pisiassat nuisasut ataasiinnaasarput allanik toqqagassaqarani, illuani Nuummi jyskimut iseraanni nerriviit sofa-llu toqqagassarpassuit amerlanerusartut. Suliffeqarfiup assigiinngippallaamik atugassaqartitsinera akueriinnarneqarsinnaanngilaq.
Nunatta pisiniarfiutaa Pilersuisoq ”anginerulersinneqassasoq” piginnittut anguniartariaqarpaat. Ukiuni arlaqalersuni Pilersuisup ingerlanneqarnera annerusumik isorliunerusuni iluarineqarneq ajorpoq, innuttaasut naammagittaalliutaat tusarneqarneq ajorput, taamaattoq suli Pilersuisup ingerlanneqarnera pittanngoriartunngilaq. Innuttaasut nioqqutissanik amerlanerusunik toqqagassaqarusuttut akerlianik Pilersuisup nioqqutissat ikililerpai. Pisisartut tusaaniarneqannginnerat uggornarpoq. Pilersuisoq illoqarfinni mikinerni nunaqarfinnilu pilersuinissamik isumaqatigiissuteqarfigineqartarpoq ukiullu tamaasa nunatta karsianit taperneqartarluni. Pilersuisoq angininngortinneqarsinnaappat qularnanngittumik imminut napatissinnaanera suli anginerulertussaavoq.
Nuna tamakkerlugu illoqarfinni anginerusuni mikinerusunilu qanga qisuusivinnik taaneqartartut pilerseqqinneqaqqittariaqarput. Ukiut makkua sanaartorneq annertusinikuuvoq inuillu aamma namminneq illuutiminnik nutarterisarnerat annerulernikuuvoq taamaammat qisuusiviit sanaartornermullu atortussaasiviit Pilersuisup pilersittariaqaraluarpai.
Kiisalu Pilersuisoq illoqarfinni tamani pequtaarniarfinnik ammaasariaqaraluarpoq. Innuttaasut pisisartut amerlanerusunik toqqagassaqarsinnaanerat naalakkersuinikkut anguniarneqartariaqarpoq innuttaasut pillugit. Nalunngilarput unammillerneq pitsaasumik kinguneqartartoq taamaammat Pilersuisoq niuernikkut suli pittaanerusumik inissittariaqarpoq.
Ilanngullugu Nuummi inuppassuaqartumi Pilersuisoq pisiniarfimmik ammaasinnaanera periarfissaasariaqarpoq.
All. Frantz Lundblad Siumut siul.ilaasortaq