Siumumi kommunalbestyrelsimi aamma nunaqarfinni aqutsisuni sulinerup ataqatigiissuunissaa pingaartipparput. Taamaammat kommunalbestyrelsimi ilaasortat aammalu nunaqarfinni aqutsisut suleqatigiinnerat nukittorsarniarlugu sulinerput pimoorupparput. Matumani Kitsissuarsuit tunisassiorfeqalernissaa ataatsimoorullugu anguniagarivarput
All.: Malene Geisler Larsen, Nunaqarfinni Aqutsisunut ilaasortaq aamma Aqqa Samuelsen, kommunalbestyrelsimut ilaasortaq, Siumut
Malene Geisler Larsen Kitsissuarsuit tunitsiveqalernissaa pillugu sulissutiginnittuni siuttut ilagivaat. Malene Geisler Larsen nunaqarfinni aqutsisutut sulinermini Kitsissuarsuit tunisassiorfeqalernissaa siunnersuutigisimavaa, pissutigalugu Kitsissuarsuit imartaa aamma aalisagaqarfissuummat inuussutissarsiutitigullu inerisaasoqarnissaanut periarfissagissaarmat.
Nipisaat suaat aallarniutaasinnaapput, piffissallu ingerlanerani saarullinnut qaleralinnullu tunitsiveqalersinnaalluni. Aalisartut piniartullu Kitsissuarsunnut tunisisinnaanissaat periarfissaalersinniarlugu inuussutissarsiornerlu inerisarniarlugu tunisassiorfeqartariaqarpoq.
Kitsissuarsunni aalisartut piniartullu angalaqqaarlutik tunisiartussagunik Aasiannut, Qasigiannguanut Akunnaamulluunniit piffissamik orsussamillu atuinerit akisoorujuusinnaapput. Kitsissuarsunni aalisartut piniartullu namminerisaminnut tunitsivimmut tunisisinnaalernissaat periarfissaasariaqartoq isumaqarpugut.
Kitsissuarsunni Aalisartut Piniartullu Peqatigiiffiat (KAPP) suleqatigalugu Kitsissuarsuit tunisassiorfeqalernissaa anguniagarivarput. Kitsissuarsuit tunisassiorfeqalerpat nunaqavissut suliffissarsiortut sulilersinnaanissamut periarfissagissaarnerulissapput. Kitsissuarsunni tunitsiviliornissamut anguniagaqarnitsinnut tapersersuisut suleqataarusuttullu tamaasa peqatiseraagut, suliniutip ataatsimoorullugu anguniarnissaa pingaaruteqarmat.
Inatsisartunut, Naalakkersuisunut, kommunimut, ingerlatseqatigiiffinnut aalisarnermik ingerlataqartunut, Kattuffinnullu allakkanik ammasunik nassiussisimavugut. Taakkua Kitsissuarsunni tunitsiveqalernissaata piviusunngortinneqarnissaanut qanoq tapersersuisinnaanersut tunniussaqarsinnaanersullu akissuteqassasut naatsorsuutigaarput. Akissutisinissatsinnut qilanaarpugut.