Qasigiannguit avatinnguani kilisaat kivisup qaqinneqarnissaa Kommune Qeqertalimmi kommunalbestyrelsemi Siumut gruppiata piumasaraa.
Qasigiannguit avatinnguani kilisaatip kivisup qaqinneqarnissaa pillugu Jess Svanep Inatsisartut suleriaasianni §37 naapertorlugu Naalakkersuisunut apeqquteqaataa, Kommune Qeqertalimmi Siumut gruppianit taperserlugu matumuuna nalunaarutigaarput.
Imartarput avatangiiserpullu inuussutissarsiornikkut toqqammavittut pinngitsoorneqarsinnaanngitsoq pingaarutilittullu inissisimasoq, ukiuni arlalinni mingutsinneqartussanngornera akuersaanngilarput. Taamaattumik imartatsinnik avatangiisitsinnillu mingutsitsineq minnerpaaffilerniarlugu Qasigiannguit avatinnguani kilisaat kivisoq piaartumik qaqinneqarnissaa sulissutigineqartariaqar poq, qaqinneqarsinnaaneralu ajornarpat ikummatissanut tankii imaarneqarnissaat pisariaqarpoq.
Qeqertarsuup Tunuata angallaffissuunera eqqarsaatigalugu upalungaarsimanikkut qaffasissumik pitsaassusilimmik pilersaaruteqartoqarnissaa pisariaqartoq isumaqarpugut.
Qasigiannguit avatinnguani kilisaat kivimmat ajunaarnersuartut ittuni imaatigullu annertuumik ajutoortoqartillugu nuna tamakkerlugu upalungaarsimanikkut piareersimasoqannginnera takuarput.
Pisuni ajunaarnersuartut ittuni imaatigullu annertuumik ajutoortoqartillugu nuna tamakkerlugu sillimaniarneq pitsaanerusariaqarpoq.
Kommune Qeqertalimmi kommunalbestyrelsemi Siumut gruppianiit paaserusupparput, ajunaarnersuartut ittumik pisoqartillugu nuna tamakkerlugu upalungaarsimanermi pilersaarut qanoq ingerlanersoq?
Qasigiannguit avatinnguani kilisaat kivisoq ajunaarnersuartut oqaatigineqarsinnaasoq qarsupinneqarsinnaanngilaq suusupagineqarsinnaananilu. Innuttaasut kilisaatip kivisup qanittuani najugallit toqqissisimanngissuteqarnerat paasilluarsinnaavarput. Taamaammat innuttaasut kilisaatip kivisup qanittuani najugallit oqartussaniit qanimut tikinneqarlutik piaartumik qanoq iliortoqarniarneranik pilersaarutit pillugit paasissutissiivigineqartariaqarput.
Kommune Qeqertalimmi kommunalbestyrelsemi Siumut gruppia sinnerlugu.
Aqqa Samuelsen
Gruppimi siulittaasoq.