Kalaallit Nunaat nunarsuarmioqatitsinnik soqutigineqarnera annertusiartuinnarpoq, aammattaaq ilisimalereerparput Russit aqqartartui Kiniiserillu umiarsuaat sorsuutit nunatta imartaaniittalereersut. Soorluttaaq 2016-imi Issittoq pillugu misissuisoqarsimanerata takutikkaa nakkutilliineq sillimaniarnerlu annertunerusoq nunatsinni pisariaqartinneqartoq.
Naalakkersuisut siulii, februar 2021 qallunaat naalagaaffiallu isumaqatigiissuteqarput 1,5 milliard kr-ninik nalilimmik.
Sakkulersortoqannginnissaanut periusissiaq innersuussutigalugu, Nunanut allanut sillimaniarnermullu Naalakkersuisup, Kalaallit Nunaanni dronit atorneqarnissaat aammalu nakkutilliinermut illersornissamullu Kangerlussuarmi ilinniarfimmik pilersitsinissamut Naalakkersuisut nutaat akerliunertik ersersippaat, naak ukiorpassuarni anguniagaangaluartoq
siunissami kalaallit namminneerlutik nakkutilliineq annertunerusumik akisussaaffigilissagaat.
Ilulissani isumaqatigiissut tunngavigalugu sakkulersortoqarsinnaanera pinngitsoortinniarlugu, nakkutilliinerup sillimaniarnerullu pitsanngorsaavigineqarnissaanut aningaasaliineq sakkulersornertut nalilerneqarsinnaanngilaq, taamaattoq Naalakkersuisut nutaat Kangerlussuarmi inerisaanissamut akerliunerisa apeqqutit assigiinngitsut pilersippaat.
Taava apererusunnarsivoq, Qallunaat Naalagaaffiata Kangerlussuarmi inerisaanissaanut Naalakkersuisut sakkulersorneq akerliuffigalugu tunngavilersuuteqarpata taava Amerikarmiut Pituffimmi sakkutooqarfeqarnerat qanoq piniarpaat? Aamma Islandimi aaqqissuussinerup assiganik Coast Guard-itut ittunik Naalakkersuisut pilersitserusukkunik umiarsuit nakkutilliissutit kikkut akilerniarpaat?
Siumumi isumaqarpugut, februarimi isumaqatigiissut pitsaasoq, nunatsinni nakkutilliinermik sillimaniarnikkullu patajaannerusumik inissisimalersitsisussaq siunissamullu nunaqavissunik ilinniarsimasunillu amerlanerusunik qulakkeerinnittussaq Kangerlussuarmilu suliffissanik pilersitsisussaq imaasiallaannarlugu atorunnaarsinnissaa isumatusaarnerunngitsoq.
Inussiarnersumik inuulluaqqusillunga
Doris Jakobsen Jensen, Siumut
Inatsisartut Nunanut allanut sillimaniarnermullu ataatsimiititaliaanni Ilaasortaq
Attavissaq: 539400