Kalaallit Nunaata siunissaa Inuiaat Kalaallit pigaat – Kalaallit Nunaat tuniniagaanngilaq! Ippassaq Amerikamiut Senateanni tusarniaaneq takutitseqqippoq, qanoq pissaanilissuit Nunarput pillugu isumaqatiginninniarnersut, uagut peqataaffiginngisatsinnik – periuseq akuerineqarsinnaanngilluinnartoq. Demokratit nunat tamalaat akornanni isumaqatigiissutinik attassisut, Republikanerit takutippaat, Kalaallit Nunaata nammineq aalajangiisinnaassuseqarneranut paasinninnerulersimallutik. Oqaluttuarisaanermi avataaniit aalajangersarneqartarsimasut annertuumik kinguneqartarsimapput, Siumullu namminiussuseqarnissarput pillugu tamaviaarussinini attappaa. Siunissarput uatsinnit aallaaveqartumik aalajangersarneqassaaq.
All: Erik Jensen, siulittaasoq
Ippassaq Senatemi tusarniaaneq Siumumit malinnaaffigaarput, ingerlaneratalu takutippaa, aalajangersaanissaq suli uagut qulaalluta ingerlanniarneqarpaluttoq. Erseqqilluarpoq, Amerikamiut akunnerminni uagut pilluta isumaqatiginninniartut, soorlu nunasiaateqartarsimasut allat assigalugit. Tamanna akuerineqarsinnaanngilluinnarpoq. Avataaniit qinersinissarput sunnerniarneqarpoq, taamaattoq uagut avataaniit qanoq isummernissatsinnik oqaluttuuneqassanngilagut.
Oqallinneq ataatsimut isigalugu eqqarsaqqissaarnerulaalersimanertut nalilerneqartariaqarpoq, malunnarluarporlu, Demokratit nunat tamalaat akornanni isumaqatigiissutinik attassinerminnik erseqqissaasartut aamma paasisimagaat, Nunarput tuniniagaanngitsoq. Ilutigisaanik Republikanerit nipimikkut saamarpalunnerulersimapput, aamma suleqatigiinnissamik nipi atornerulersimavaat paasisimasaqarfiginerulersimagunarlugu nunat tamalaat akornanni isumaqatigiissutit avaqqullugit namminneq aalajangiisinnaannatik, aamma tamanna pisinnaanngitsoq, Inuiaat Kalaallit peqataatinnagit akuersitinnagillu.
Tamanna immini ajunngitsuuvoq, pingaartumik Amerikamiut namminneq oqaluttuarisaanerata takutimmassuk, nunat inoqqaavisa pisinnaatitaaffiannut qanoq arlaleriarujussuarlutik sivisuumillu unioqqutitsisarsimanerat aamma oqaluttuarisaaneq taanna arlalitsigut sakkortuuliornermik ilaqartarsimammat.
Oqaluttuarisaanermi Nunarput avataaniit aalajangersagarineqartarsimasunut sunnerneqartarsimaqaaq – uagut politikikkut akuliunneqarfigisimanngisatsinnik imaluunniit qanoq sammivilersorneqarnissaanut sunniuteqarfigisinnaasimanngisatsinnik. Aalajangersaasarsimanerit tamakku annertuumik uagut atukkatsinnut kinguneqartarsimapput, ulloq manna tikillugu malugisinnaasatsinnik. Siumut aalajaalluni namminiussuseqarnitsinnik tamaviaarussiuarnera nutaarsiassaanngilaq – aallarteqqaarnerminiillu taanna tunngaviulluni inissisimasimavoq. Kalaallit Nunaat kalaallit pigaat!
Ilutigisaanik aamma kissaatigaarput atugarissaarnikkut nukittuumik qaffasinnerusumillu inissisimalissasugut, suliffiit amerlanerusut pilersinneqassasut, akeqanngitsumik kikkut tamarmik ilinniarsinnaanerat peqqinnissaqarfimmillu atuisinnaanerat pisinnaatitaaffiussasut, oqartussaaqataanerput nukittorsarneqassasoq aamma attavilersuutitigut pitsanngorsaasoqassasoq.
Inuiaavugut nunat tamalaat akornanni isumaqatigiissutit naapertorlugit Inuiattut akuerineqarsimasut, ilutigisaanillu aamma nunat inoqqaajuvugut immikkut pisinnaatitaaffeqartut. Uagut siunissarput pisaanilissuit soqutigisaanit taamaallaat aalajangersarneqassanngilaq. Kissaatigaarput Europa aamma USA suleqatigissallugit, kisianni tamanna uagut nammineq aallaavigaluta pissaaq.