Kalaallit Nunaata siunissami isumannaallisaanikkut unammilligassat piareersimaffigissavai
All.: Ane Lone Bagger
Maanna Dubai-mi aallarnaveeqqavgut, kangia qiterlermi sorsuttoqarnerata sakkortusinerata kingunerisaanik, USA-llu Iran-imut sakkulersorluni saassussinerata kingorna. Tamatuma ersersippaa, nunarsuarmi pissutsit qanoq sukkatigisumik allanngorsinnaanersut aammalu innuttaasunut qanoq sunniuteqartigisinnaanersut.
Tamanna ilutigitillugu USA-p arlaleriarluni Kalaallit Nunaat aqutsiviginiarlugu kissaateqarluni oqaatigisarpaat, aammalu sakkutuulersorluni tiguarniarluni sioorasaaruteqartarsimallutik. Tamatuma takutippaa, Kalaallit Nunaat namminiilivinnissaminut, killeqarfimmik nakkutiginninnissanik aammalu isumannaatsuunissamut akisussaaffimmik tigusisinnaanissaminut piareersimalluinnartariaqartoq.
2019-imi Issittumi tunngaviusummik ilinniarneq qitiuffigalugu aallarnisarpara, maannakkut ingerlalluartumik, inuusuttunik soqutigineqarluartumik. Allaat maannakkut utaqqisut annikillisarniarlugit atuaqatigiiaat 50-inut qaffatsinneqarsimasumik pilersitsinissamut suliniuteqarpunga. Siunertaralugu Kalaallit Nunaanni innuttaasut piginnaasaannik ineriartortitsineq, taamaalilluni nuna nammineq piareersarneq, nakkutilliineq aammalu killeqarfimmik nakkutilliisinnaaneq isumagisinnaaqqullugu.
Kalaallit Nunaat pisariaqartitsivoq nammineq innuttaasunit ilinniarsimasunit, killeqarfimmik illersuisinnaasunik nakkutiginnissinnaasunillu – pingaartumik silap pissusaata allanngoriartornera, imaatigut angallannerup, takornariaqarnerullu annertusinerisa kingunerisaanik, maannakkullu issittulerngusaanneq eqqarsaatigalugu. Tamanna periarfissanik nutaanik pilersitsivoq, kisianni aamma aarlerinartorsiortitsivoq, taamaattumillu aaqqissuussaalluartumik piareersarnissaq aammalu akisussaaffeqarnissarlu pisariaqartinneqarput.
Pingaartumik avinngarusimasuni isorliunerusunilu piniartut pingaarutilimmik inissisimapput, ukioq naallugu pinngortitarsuatsinnik ilisimaarinnilluartuullutik najortuagartik ilisimalluarpaat. Taakkuuppullu nunatsinni “siuteralugillu isissagut” pingaarutilimmik inissimasut, nakkutilliinermut, piareersarnermut aammalu aarlerinartoqarneranik siusinaartumik nalunaaruteqarnermut iluaqutaasinnaallutik. Tamanna aaqqissuussaasumik ingerlanneqartariaqarpoq, piniartut taamatut atuunnerminnik soorunalimi aaqqissuussaasumik pilersinneqassaaq akissarsiaqartinneqarlutik, taamaalillutik sulinerat nunatsinnut isumalerujussuaq ataqqineqarluni aammalu atajuarsinnaasumik ingerlanneqarsinnaalluni.
Kalaallit Nunaat namminiilivinnissaminut akisussaaffeqarluartumillu siunissaminut piareersimassappat, ilinniartitaanermut, piareersarnermut aammalu nuna tamakkerlugu piginnaasanik ineriartortitsinermut aningaasaliineruvoq aalajangiisuulluinnarpoq. Issittumi Tunngaviusumik ilinniartitsineq tassaavoq taamatut siunertalimmik tigussaasumik alloriarneq.