Pingaaruteqarpoq illoqarfiit nunaqarfiillu allatuulli ineriartortinneqarnissaat. Inatsisartuni Siumup siunnersuutiginikuuaa, avinngarusimanerusuni najugaqarneq sulinerlu immikkut ittumik aaqqissuussivigineqassasut. Suliaq taanna nanginneqarluni naammassillugu ilusilersorneqassaaq.
All.: Jess Svane, Siumut sinnerlugu Inatsisartunut qinigassanngortittoq
Nunaqarfinni illoqarfinnilu mikinerusuni najugaqarneq suliffimmullu atatillugu periarfissat pitsaanerusariaqarput. Tamanna piviusunngortinneqassappat, nunap immikkoortuini mikinerusuni najugaqarnermi aningaasatigut iluaqutissat amerlanerit pilersinneqartariaqarput – taamaalilluni ilinniagaqareerlutik angerlartartut amerlanerulernissaat anguneqarniassammat.
Tamatta ilisimavarput illoqarfinni mikinerusuni nunaqarfinnilu najugallit ikinngitsut ilinniagaqareernerminni aggerfimminnut uteqqinngitsoortartut. Soorunami tamanna inuup nammineq aalajangigassaraa. Nalunngilarpulli nunaqarfiit illoqarfiillu mikinerit ineriartornissaasa unammillernartorsiortinneqarnerat, atugarissaarnerullu ineriartortinnissaanut pisariaqartinneqartut taakkunani naammattumik atugarineqalerneq ajortut.
Ineriartorneq taanna mumisittariaqarparput, najugaqarnermi suliffimmullu atatillugu iluaqutissat pitsaanerulersillugit.
Suliarput nangillugu ingerlanniarparput
Nunaqarfinni illoqarfinnilu mikinerusuni najugaqarnermi suliffimmullu atatillugu pissarsiassat pitsaanerulersinneqartariaqartut avaqqussinnaanngilarput. Tassunga atatillugu akileraartarnermi iluaqutissat aningaasatigullu periarfissat pitsanngorsarneqarnissaat anguneqartariaqarpoq.
Inatsisartuni Siumup siunnersuutiginikuuaa, avinngarusimanerusuni najugaqarneq sulinerlu immikkut ittumik aaqqissuussivigineqarnissaat pisariaqalersoq pillugu. Kingorna nalunaarusiorneqarsimavoq, Norgep avannaani najugaqariaaseq isumassarsiorfigalugu qanoq assingusumik nunatsinni aaqqissuussisoqarsinnaanersoq nalilersorlugu.
Siumut isumaqarpoq suliaq taanna nanginneqarluni naammassillugu ilusilersorneqassasoq. Nunatta siammasissumik toqqissisimanartumillu najugaqarfigineqarnissaa tamatta soqutigisaraarput. Nunaqarfinni illoqarfinnilu mikinerusuni najugaqarneq orniginarnerulissappat, sulisut atukkatigut immikkut pitsanngorsaavigineqarnissaat avaqqunneqarsinnaanngilaq. Taamaanngippat Siumup aarleqqutigaa, ukiut ingerlanerini nunatta ilarujussuaq najugaqarfigineqarunnaassasoq. Tamannalu tamatta qamuuna kissaatigigunanngikkipput Siumup qularutiginngilaa.
Siunissami nunatta siammasissumik najugaqarfigineqarnissaa qulakkeerumallugu pilersaarusiorneq aallartittariaqarpoq, pingaaruteqarpormi illoqarfiit mikinerit nunaqarfiillu allatuulli ineriartortinneqarnissaat. Innuttaasut periarfissinneqartariaqarput nunagisaminnut uterlutik najugaqarnissaminnut, suliassarlu taanna ukiuni kingullerni nukinginnarsiartuinnartoq tamatta isigaarput.