Ivaaqqami inunnik innarluutilinnik sullissineq pitsanngorsartariaqarpoq
Siumut paasitinneqarpoq Qaqortumi inunnik innarluutilinnut sullissivik, Ivaaraq, sulisut suli ikippallaartarnerat pissutigalugu annertuumik ajornartorsiuteqartoqartoq.
Ivaaraq pillugu ukiut siuliini imaannaanngitsut pisimasut eqqarsaatigalugit Siumut isumaqarpoq inunnik innarluutilinnik sullissinerup pitsaasuunissaannik siunertaqarneq tunngavigalugu, nakkutilliisoqarneq naammattumik ingerlasimanngitsoq nukittorsarneqartariaqartorlu. Aamma oqartussanit iliuuseqartoqarani ineqartunut qanigisaasunullu ajorluinnartumik kinguneqarsimasoq peqqinngisaannarnissaanik qulakkeerinnittumik suleriaqqittoqartariaqartoq. Taamaattumik Naalakkersuisut suli qulakkeerinnissimasutut inissisimarpasinngimmata, aammalu ineqartunut qanigisaasunut, inunnillu innarluutilinnut sulisut piusut ilungersornerat atugassarititaasutigut toqqissisimanartumik ataqqinnittumillu ingerlanneqarnissaat qulakkeerneqartariaqartoq.
– Innuttaasut ikiorneqarnissaminnut pisariaqartitsisut ikittuinnarmik sulisunit isumagineqartillugit, ineqartut pisariaqartitaat naleqquttumik naammassineq ajornarsisimasutit aammalu isumannaatsumik toqqissisimasumillu inuit innarluutillit sullinneqalersimanerata kingunerisaanik ilungersunartumut killiffeqarpoq, Siumup inatsisartuni gruppiata siulittaasua Erik Jensen oqarpoq.
Siumut isumaqarpoq maanna ersarilluinnartumik takutinneqartoq, nakkutilliisoqarneq Naalakkersuisuni inissisimasinnaajunaartillugu allatut aaqqiisoqartariaqalersoq, inuit pineqartut illersorniarlugit. Pisariaqarpoq ingerlatsiviit avataaniittumik nakkutilliisoqarfimmik pilersitsinissaq, inatsisit erseqqissumik aalajangersagallit tunngavigalugit sulisussamik. Erseqqissumik aalajangersarneqassapput suliassat pisinnaatitaaffiillu, aalajangersimasumik piffissaliilluni nakkutigineqartussat, aaqqissuussamik misissuinerit aammalu Naalakkersuisut inassuteqaatigineqartunut malinnittassasut.
Nakkutilliineq immikkut inissisimasoq pisinnaalluarlunilu ingerlanneqartoq pisariaqarpoq, Ivaaqqatut ittuni najugaqartunut isumassuineq, toqqissisimaneq inunnillu pineqartunik ataqqinninneq qulakkeerneqaqqullugit, tamakkumi pisinnaatitaaffigaat.
– Inuiaqatigiittut ataatsimoorluta pisussaaffeqarpugut innuttatsinnut immikkut pisariaqartitsisunut pitsaanerpaamik atugassaqartitsinissatsinnut. Taamaattumik Siumut isumaqarpoq pisariaqartoq, nakkutilliinermut akisussaaffik allanngortinneqassasoq, taamaalillutik pineqartut pisinnaatitaaffii eqqarsaatigalugit eqqortitsisoqarniassammat.” Siumumiit Erik Jensen oqarpoq.